Միխալկովը՝ հետխորհրդային տարածքում ժողովուրդների բաժանման վտանգների մասին

Ռուսաստանյան հայտնի ռեժիսոր և դերասան Նիկիտա Միխալկովը իր «Բեսոգոն» ծրագրում խոսել է հետխորհրդային տարածքում ժողովուրդների միասնությունը քայքայելու միտված գործողությունների մասին։ Ինչպես նշում է «Царьград»-ը, Միխալկովը օրինակներով ներկայացրել է պատմական հիշողության միտումնավոր վերաձևման մեխանիզմները։

Նրա խոսքով՝ մի շարք նախկին խորհրդային հանրապետություններում պատմության դասագրքերը միակողմանի ներկայացնում են խորհրդային շրջանը՝ առանձնացնելով բացասական դրվագները։ Մասնավորապես, ըստ Միխալկովի, Ուզբեկստանի դասագրքերում պնդվում է, թե ԽՍՀՄ ժամանակ տնտեսությունը ենթարկվել է կենտրոնի շահերին, իսկ հանրապետությունը դիտարկվել է որպես հումքային հավելված։ Միաժամանակ լռության են մատնվում այդ ժամանակաշրջանի ձեռքբերումները՝ ենթակառուցվածքների զարգացում, արդյունաբերություն, գրագիտության բարձրացում։

Միխալկովը նաև նշել է, որ ադրբեջանական որոշ դասագրքերում առկա են բացահայտ ռուսաֆոբ գնահատականներ։ Ըստ նրա՝ այնտեղ ներկայացվում է իբր «Բաքվի բնակչության կանխամտածված ոչնչացման» պատմություն և փոխարինվել է «Մեծ Հայրենական պատերազմ» հասկացությունը՝ «Երկրորդ համաշխարհայինով»։

Միխալկովը քննադատել է ռուսական իշխանություններին՝ այս երևույթին երկար տարիներ անտարբեր մնալու համար՝ նշելով, որ այժմ արդեն տեսանելի են այդ «բարեկամական հարաբերությունների» խաթարման հետևանքները։