Օձի խայթոցի հերթական դեպքը Սպիտակ քաղաքում

Այսօր՝ օգոստոսի 4-ին, օձի խայթոցի հերթական դեպքն է արձանագրվել Լոռու մարզում: Այս մասին Euromedia24.com-ը տեղեկանում է Սպիտակի բժշկական կենտրոնից։ «Ժամը 18:00-ի սահմաններում Սպիտակի բժշկական կենտրոն է դիմել 40-ամյա տղամարդ՝ կրունկ-թաթային հատվածում օձի խայթոցով:

 

Հերթապահ բուժանձնակազմի կողմից անմիջապես իրականացվել է վերքի առաջնային զննում, վիրաբուժական մշակում, կատարվել է հակափայտեցման անատոքսին, ներարկվել է հակաթույն:

 

Տղամարդու վիճակը գնահատվել է բավարար, մի քանի ժամ հսկվելուց հետո դուրս է գրվել:

 

Հարգելի բնակիչներ, մեկ անգամ եւս հիշեցնում ենք, որ օձի խայթոցի դեպքում ինքնաբուժությամբ զբաղվելը կարող է անցանկալի հետեւանքներ առաջացնել, այդ իսկ պատճառով մեկ անգամ եւս հորդորում ենք չզբաղվել ինքնաբուժությամբ, անմիջապես դիմել մոտակա բժշկական կենտրոն, ստանալ անհրաժեշտ մասնագիտական բուժօգնություն, այդ թվում՝ հակաթույն:

 

Սպիտակի բժշկական կենտրոնը ապահովված է համապատասխան բոլոր պատվաստանյութերով եւ անհրաժեշտ հակաթույնով»,-Հայտնում են բժշկական կենտրոնից: 

 

Հիշեցնենք, որ սա այս տարվա ընթացքում օձի խայթոցով Սպիտակի բժշկական կենտրոն դիմելու 3-րդ դեպքն է: