Երևանի N հիմնական դպրոցում համակարգողը սպառնացել է ուսուցիչներին, որ «քաղաքապետարանից կզանգեն ու «անել կտան»

ՀՀ կրթության տեսչական մարմինը ստացել է Երևանի N հիմնական դպրոցում ներդպրոցական կոնֆլիկտի վերաբերյալ ուսուցիչներից մեկի դիմումը, որի հիման վրա տեսչական մարմնի նախաձեռնությամբ հարուցվել է վարչական վարույթ։ ՀՀ կրթության տեսչական մարմինը մանրամասներ է հայտնել ներդպրոցական կոնֆլիկտից։

 Ինչ էր տեղի ունեցել

Տնօրենի մասնագիտացված կրթական աջակցությունների համակարգողը դպրոցում ունեցած անձնական շահերի հիմքով միջամտել է ուսումնական գործընթացին՝ վիճաբանելով «Հայոց լեզու» և «Աշխարհագրություն» առարկաների ուսուցիչների հետ՝ իր երեխայի գնահատականների շուրջ։ Նա զայրույթի պահին սպառնացել է, որ «քաղաքապետարանից կզանգեն ու «անել կտան»», արգելել է իր երեխային մասնակցել միջոցառմանը, սակայն հետագայում փոխել էր որոշումը։ Վեճից հետո երկու կողմերն էլ հանդես են եկել փոխադարձ համաձայնությամբ՝ գրավոր նշելով, որ չունեն բողոքներ։

 Բացահայտված խախտումներ

Ոտնահարվել են մանկավարժական բարեվարքության վարքականոնի, Մանկավարժական աշխատողների բարեվարքության կանոնների (վարքականոնի) պահանջները՝ փոխադարձ հարգանքի, թիմային վստահության ու մասնագիտական չեզոքության պահպանումը։

Դպրոցի հոգեբանը չի արձագանքել իրավիճակին և աջակցություն չի ցուցաբերել։

Տնօրենը պատշաճ վերահսկողություն չի իրականացրել ներքին բարոյահոգեբանական միջավայրի վրա ազդող երևույթների նկատմամբ։

Հանձնարարական

Տեսչական մարմինը հանձնարարել է տնօրենի ժամանակավոր պաշտոնակատարին՝ վերահսկել հոգեբանի աշխատանքը և ապահովել հոգեբանական աջակցություն՝ դպրոցի բարենպաստ մթնոլորտի վերականգնման նպատակով։