Ոչ մեկի հետ ամուսնացած չենք եղել, որ ամուսնալուծվենք. Աշոտյանը՝ ընդդիմադիրների հարաբերությունների մասին

Նորմալ եմ համարում, որ տարբեր քաղաքական ուժերի միջև կարող են լինել տարաձայնություններ, նորմալ չեմ համարում, որ դրանք երբեմն դառնում են առաջնային և օրակարգում այն տեղն են զբաղեցնում, որ պետք է զբաղեցներ ազգային և պետական շահից բխող օրակարգը, մամուլի ասուլիսի ընթացքում ասաց ՀՀԿ փոխնախագահ Արմեն Աշոտյանը՝ անդրադառնալով ՀՀ 2-րդ և 3-րդ նախագահների թիմակիցների միջև տարաձայնություններին։

«Սա ամենամեծ ցավն է, որ ես ապրում եմ այս տարվա սկզբից, որովհետև դրանք մեկնարկել են հունվար-փետրվար ամիսներից։ Այս դաշտում տեսնում եմ որոշակի տերմինների մանիպուլյացիա. ես և իմ ընկերները երբեք չենք խոսել այն մասին, որ ընտրություններին պետք է գնանք միասին։ Այսինքն՝ տարանջատվում ենք, որ առանձին գնանք ընտրությունների, ինքնին մանիպուլատիվ է, քանի որ երբեք ոչ մի ՀՀԿ-ական չի աասել, թե պետք է միասնական դաշինքով գնալ ընտրությունների»,-ասաց Աշոտյանը։

Նրա խոսքով՝ երկրում այնքան շատ են խնդիրները, որ պետք չէ սինթեզել և արհեստական խնդիրներ մոգոնել։

«Եթե իրոք գործընթացները գնային այն ուղղությամբ, որ Հայաստանում քաղաքական հնարավոր զարգացումների համար տրիգեր կարող է լինել ոչ թե իմպիչմենթը, այլ ընտրությունները, այս պարագայում պետք է այնպես դիրքավորվել, որ հետո երեսատեղ ունենալ իրար հետ աշխատելու։ Դա շատ կարևոր է»,- ասաց Արմեն Աշոտյանը։

Նա շնորհակալություն հայտնեց ՀՀ 2-րդ նախագահի քաղաքական թիմին՝ մինչև փետրվար ամիսն իր նկատմամբ դրսևորած սրտացավության համար։

«Իսկ ոմանք շարունակել են այդ սրտացավությունը դրսևորել անկախ այն բանից, որ դաշտում սերմանվել է «տարանջատում» օպերացիան։ Մենք ոչ մեկից տարանջատվելու ոչ խնդիր ունենք, ոչ նպատակ, որովհետև ոչ մեկի հետ երբևէ այդքան մերձեցված չենք եղել, որ բաժանվենք։ Ոչ մեկի հետ ամուսնացած չենք եղել, որ ամուսնալուծվենք»,-ասաց Աշոոտյանը։