Թրամփի կողմից հայ-ադրբեջանական կոնֆլիկի լուծումը մտահոգություններ է առաջացնում. Աշոտյան

Ակնհայտ է, որ ԱՄՆ նախագահի համար իր պաշտոնավարման մի մասը վերածվել է Նոբելյան մրցանակի համար բոնուսներ՝ ինչպես հայտնի խաղում է՝ «սունկեր ուտելուն», «աստղեր հավաքելու» գործողության։ Այս մասին այսօր հրավիրված ասուլիսում ասաց ՀՀԿ փոխնախագահ Արմեն Աշոտյանն՝ ընդգծելով, որ հայ-ադրբեջանական կոնֆլիկտի թեկուզ իր ձևով՝ «թրամփավարի» հանգուցալուծումը կարող է լինել այդ Նոբելյան մրցանակի «կրեդիտ քարտի» վրա որոշակի քաղաքական հերթական բոնուս դառնալ։ 

«Իմ մտավախությունները այստեղ երկուսն են։ Առաջինը, շատ ուղիղ ասեմ, գեոպոլիտիկն է, որովհետև նման տեսակի գործարքի հնարավոր ի հայտ գալը տարածաշրջանում բնական գեոպոլիտիկ ներկայություն չունեցող ուժի հովանու ներքո՝ պրոբլեմատիկ է լինելու Հայաստանի արտաքին և անվտանգային միջավայրերի համար։ Հիշեցնեմ, որ երկար ժամանակ է Փաշինյանի բանագնացները և բանախոսները հպարտանում էին, որ որևէ միջնորդի կարիք չունեն, իրենք շատ լավ բանակցում են Ադրբեջանի հետ։ Իհարկե, դա սուտ էր, որովհետև իրենք շատ վատ են աշխատում Ադրբեջանի հետ, որովհետև դժվար է բանակցություն կոչել այն, ինչ կատարվում է «ռեալ թայմ» ռեժիմում Հայաստանի ազգային շահերի հետ»։ 

Նա նաև հիշեցրեց 2020 թվական հոկտեմբերի 26-ին՝ 44-օրյա պատերազմի ժամանակ երրորդ հրադադարի փորձի մասին, երբ պատերազմի ընթացքում տապալվել էին հրադադարի ռուսական և ֆրանսիական փորձերը, իսկ արդեն հոկտեմբերի 26-ին տապալվեց նաև ամերիկյան՝ Թրամփի ադմինիստրացիայի հրադադարի փորձը։ «Ինչքան տևեց էդ հրադադարը, քանի ժամ։ Ի՞նչ արժեք ուներ այն թուղթը, որ ստորագրվեց Թրամփի նախորդ ադմինիստրացիայի հովանու ներքո՝ այն ժամանակվա արտգործնախարարների միջև։ Ի՞նչ կյանք ունեցավ այդ թուղթը։ Այսինքն, մենք անցել ենք, չէ՞, դա արդեն, մենք գիտենք, որ այդպիսի թղթերը, որոնք ոչնչով հիմնավորված չեն և չունեն ռեալ բովանդակություն, ոչ թե լուծում են իրավիճակը հողի վրա մեր տարածաշրջանում, այլ էլ ավելի են լարում այդ այն իրավիճակը, որը ստեղծվել է»։