Պուտինը չի զիջում Թրամփի ուլտիմատումին՝ չնայած նոր պատժամիջոցների սպառնալիքին

Ռուսաստանի նախագահ Վլադիմիր Պուտինը չի պատրաստվում ընդունել ԱՄՆ նախագահ Դոնալդ Թրամփի ուլտիմատումը՝ հրադադար հաստատելու պահանջով, հայտնում են Reuters-ին Կրեմլին մոտ կանգնած աղբյուրները։ Թրամփը սպառնացել է նոր պատժամիջոցներով և 100% մաքսատուրքերով ռուսական նավթի գնորդների՝ Չինաստանի և Հնդկաստանի նկատմամբ, եթե Մոսկվան չդադարեցնի պատերազմը։

Ըստ աղբյուրների՝ Պուտինը համոզված է, որ Ռուսաստանը հաղթում է, և կարծում է, որ ԱՄՆ նոր պատժամիջոցներն այլևս քիչ ազդեցություն կունենան։ Նրա նպատակը մնում է նույնը՝ ամբողջությամբ վերահսկել Դոնեցկի, Լուգանսկի, Զապորոժիեի և Խերսոնի մարզերը, այնուհետև միայն քննարկել խաղաղության հարցը։

Չնայած նրան, որ Պուտինը չի ցանկանում լարել հարաբերությունները Թրամփի հետ, նա առաջնահերթ համարում է իր ռազմական նպատակը։ Թրամփի ներկայացուցիչը հայտարարել է, որ նախագահը ցանկանում է դադարեցնել սպանությունները՝ սպառնալով կոշտ տնտեսական քայլերով։ Սակայն Մոսկվայում վստահ են, որ Թրամփը նախկինում էլ է նման սպառնալիքներ հնչեցրել՝ առանց դրանք իրականացնելու։

Մյուս կողմից՝ ԱՄՆ-ը դեռ մարտին առաջարկել էր վերացնել պատժամիջոցները և ճանաչել Ղրիմի ու Ռուսաստանի վերահսկած տարածքների փաստացի վերահսկողությունը՝ հրադադարի դիմաց։ Սակայն Պուտինը, ըստ աղբյուրի, մերժել է դա՝ նախընտրելով շարունակել պատերազմը՝ նույնիսկ այս «ֆանտաստիկ հնարավորության» գնով։