Եվրոպան հաջողությամբ փորձարկել է ամերիկյան Patriot-ին «պատասխան» հանդիսացող Aster Block 1 NT հրթիռը

Ֆրանսիայում վերջերս հաջողությամբ փորձարկվել է Aster Block 1 NT հրթիռը, որը դիտարկվում է որպես Եվրոպայի պատասխան ամերիկյան Patriot համակարգին։ Ինչպես հայտնում է Defence24-ը, հուլիսի վերջին Նոր Ակվիտանիայի Բիսկարոս փորձադաշտում հրթիռը հաջողությամբ հայտնաբերել և ուղեկցել է թիրախը՝ այն խոցելով 150 կմ հեռավորության և 25 կմ բարձրության վրա։

Սա Aster Block 1 NT-ի երկրորդ փորձարկումն էր։ Փորձարկվել են նաև համակարգի նոր ինքնաուղղիչ և էլեկտրոնային բաղադրիչները։ Հրթիռները նախատեսված են արդիականացված ֆրանսիական և իտալական SAMP/T NG ՀՕՊ համակարգերի, ինչպես նաև եվրոպական ռազմածովային նավերի համար։

MBDA կոնցեռնը հայտարարել է, որ այս հրթիռների արտադրությունը կաճի 40%-ով այս տարի և կրկնապատկվելու է 2026-ին։ Ֆրանսիան, Իտալիան և Բրիտանիան արդեն ծրագրում են Aster Block 1 NT-ի գնումներ՝ ամրապնդելով իրենց ռազմաօդային պաշտպանությունը։