Մոսկվան շարունակում է Ուկրաինայում իր ռազմավարական առաջխաղացումը

Ռուսաստանի նախագահ Վլադիմիր Պուտինը, ըստ Կրեմլին մոտ կանգնած աղբյուրների, չի պատրաստվում ենթարկվել ԱՄՆ նախագահ Դոնալդ Թրամփի վերջնագրին, որը պահանջում է մինչև ուրբաթ դադարեցնել պատերազմը Ուկրաինայում՝ սպառնալով նոր պատժամիջոցներով և 100% մաքսերով ռուսական նավթ գնող երկրներին՝ այդ թվում Չինաստանին և Հնդստանին։ Աղբյուրների փոխանցմամբ՝ Պուտինը վստահ է, որ Ռուսաստանը հաղթում է և ԱՄՆ-ի նոր պատժամիջոցներն առանձնակի ազդեցություն չեն ունենա, քանի որ երկիրը արդեն դիմակայել է մի քանի փուլով տնտեսական ճնշումների։

Թեև Պուտինը չի ցանկանում բացահայտ հակադրվել Թրամփին և գիտակցում է, որ հրաժարվում է Վաշինգտոնի հետ հարաբերությունները բարելավելու հնարավորությունից, նա առաջնահերթ համարում է Ուկրաինայի Դոնեցկ, Լուգանսկ, Զապորոժժյա և Խերսոն շրջանների ամբողջական գրավումը։ Ներկայում ռուս-ուկրաինական բանակցությունները, որոնց ընթացքում քննարկվում են միայն հումանիտար հարցեր, Կրեմլը ներկայացնում է որպես խաղաղության պատրաստակամության ցուցանիշ՝ ազդելու Թրամփի վրա, հայտնում է Reuters-ը։

Թեև ԱՄՆ-ի պատժամիջոցների սպառնալիքները Մոսկվայում համարում են «ցավոտ, բայց ոչ աղետալի», Պուտինը շարունակում է պատերազմը՝ հիմք ընդունելով ռազմաճակատում ունեցած առաջխաղացումները և համոզված լինելով, որ «այս պահին կանգնելը սխալ է»։ Միևնույն ժամանակ, Կրեմլը չի հերքում, որ առկա է սակավ հնարավորության պատուհան՝ մինչև վերջնագրի ժամկետը՝ ԱՄՆ-ի հատուկ բանագնացի այցով, հնարավոր գործարքի կնքման համար։