Ռուսաստանում առաջարկում են տուգանել ծնողներին երեխաների «սատանայի էներգիան սնուցող» վարքի համար

Մոսկվայի մարզի մանկական օմբուդսմեն Կսենիա Միշոնովան առաջարկել է տուգանել հայհոյող դեռահասներին և նրանց ծնողներին՝ օրինակ բերելով Ղազախստանի փորձը։ Նրա խոսքով՝ արդեն 11 տարեկանից երեխաները սկսում են օգտագործել հայհոյանքներ, և անհրաժեշտ է իրավական արձագանք՝ «պատասխանատվության ձևով», գրում է Gazeta.ru-ն։

Միշոնովան ընդգծել է, որ հայհոյանքը պետք է դիտարկվի որպես սոցիալական վտանգ ներկայացնող երևույթ։ Նա հավելել է, որ հասարակությունն այժմ աչք է փակում խնդրի վրա, մինչդեռ նախկինում նման բառապաշարն ասոցացվում էր միայն հակասոցիալական վարքի հետ։ Օմբուդսմենն ընդգծել է, որ հայհոյանքը «սնուցում է սատանայի էներգիան»։ «Մի անգամ հոգևորականն ինձ ասաց՝ այդ բառերն ուժ են տալիս սատանային, երբ մենք դրանք արտաբերում ենք», — հայտարարել է Միշոնովան։

Ավելի վաղ Բրյանսկի մարզի պատգամավոր Միխայիլ Իվանովը նույնպես առաջարկել էր տուգանել ծնողներին՝ սոցիալական ցանցերում ալկոհոլի և երեխաների մասնակցությամբ լուսանկարներ հրապարակելու համար՝ նշելով, որ դա խաթարում է երեխաների արժեքային ընկալումը։