ԱՄՆ-ում կասկածում են՝ արդյո՞ք Սու-57-ը իրականում զինվել է հիպերձայնային հրթիռով

Ամերիկյան The National Interest հանդեսը գրում է, որ ռուսական հինգերորդ սերնդի Սու-57 կործանիչի զինումը հիպերձայնային հրթիռներով հարցեր է առաջացրել ռազմական վերլուծաբանների շրջանում։

Հոդվածի հեղինակը՝ Փիթեր Սուչյուն, նշում է, որ եթե Սու-57-ը հիպերձայնային հրթիռներ ստանա, դա կդառնա կարևոր թռիչք տեխնոլոգիական առաջընթացի ուղղությամբ։ Սակայն նա նշում է մի շարք անհստակություններ՝ այդ թվում, թե քանի հրթիռ կարող է իրականում կրել կործանիչը։ Սուչյուն նաև հարց է բարձրացնում՝ արդյո՞ք Սու-57-ը զինվել է «Ցիրկոնի» հատուկ տարբերակով, թե՞ «Կինժալ» հրթիռով։

Նրա գնահատմամբ՝ հիպերձայնային զենքի շուրջ առաջացած «հանկարծակի աղմուկը» կարող է պարզապես լինել փորձ՝ աշխարհում ուշադրություն գրավելու Սու-57-ի նկատմամբ և խթանելու նրա արտահանման շուկան։ Ավելի վաղ Military Watch Magazine-ը նշել էր, որ ռուսական օդատիեզերական ուժերը Ուկրաինայում Սու-57-ի «ամբողջական ստորաբաժանումներ» են օգտագործում։