Բնակարան, կայանատեղի, 50․5 մլն փոխառություն, 7․5 մլն ավանդ, 35․5 մլն եկամուտ․ Ռուբեն Ռուբինյանի և կնոջ ունեցվածքը

Oragir.News-ը ներկայացրել է Ազգային ժողովի փոխնախագահի պաշտոնը զբաղեցնող Ռուբեն Ռուբինյանի և նրա կնոջ՝ Մարիամ Հաջի-Հակոբյանի՝ 2024 թվականի գույքի և եկամուտների հայտարարագրերը․

«Ռուբեն Ռուբինյանը տարեսկզբին անշարժ գույք չի հայտարարագրել, սակայն 2024 թվականի նոյեմբերի 26-ին նա ձեռք է բերել բնակարան և կայանատեղի՝ Երևանում, որոնց նա տիրապետում է միանձնյա սեփականությամբ։ Տարեվերջին նրա անշարժ գույքը նույնությամբ պահպանվել է։

Շարժական գույք՝ ավտոմեքենա, նա չի հայտարարագրել։

Ռուբինյանը տարեսկզբին 47 մլն 900 հազար դրամ փոխառություն է ունեցել «Կանաչ Թաղ» ՍՊԸ-ում, որը տարեվերջի դրությամբ կազմել է 50 մլն 500 հազար դրամ։

Բացի այդ, նա առևտրային բանկերում 2 ավանդ է ունեցել, որոնց հանրագումարը տարեվերջին կազմել է 7 մլն 500 հազար դրամ։

Վերջինիս բանկային հաշիվներին տարեսկզբին եղել է 10 մլն 396․107 դրամ, տարեվերջին՝ 2 մլն 784․178 դրամ։ Կանխիկ միջոցներ՝ նա չի հայտարարագրել։

2024 թվականի հաշվետու տարում Ռուբեն Ռուբինյանի եկամուտները կազմել են 17 մլն 373․544 դրամ, որից 14 մլն 229․360 դրամն ԱԺ-ից ստացած աշխատավարձն է, 2 մլն 836․705 դրամը՝ Ֆիննախից ստացած եկամտահարկի վերադարձը, 307․479 դրամը՝ Ինեկոբանկից ստացած այլ եկամուտը։

Ստացված վարկերի և փոխառությունների մայր գումարի մնացորդը հաշվետու տարվա դեկտեմբերի 31-ի դրությամբ 31 մլն 302․029 դրամ։

Ռուբինյանն իր եկամուտներից 3 մլն 609․137 դրամ հատկացրել է վարկի մարմանն ուղղված վճարումներին, 5 մլն 275․940 դրամ էլ անշարժ գույքի վերանորոգման ծախսերին։

Վերջինիս կինը՝ Մարիամ Հաջի-Հակոբյանը, շարժական և անշարժ գույք չի հայտարարագրել։

Նա ՄԼ Մայնինգ ՍՊԸ-ում ունեցել է 13 մլն 291․053 դրամ փոխառություն, որը տարեվերջին նույնությամբ պահպանվել է։ Բացի այդ, նա առևտրային բանկերում ունեցել է 2 ավանդ, որոնց հանրագումարը տարեվերջին կազմել է 1 մլն 561․266 դրամ։

Հաջի-Հակոբյանի բանկային հաշիվներին տարեսկզբին եղել է 736․289, տարեվերջին՝ 249․239,53 դրամ։ Նրա կողմից հայտարարագրված կանխիկ միջոցները տարեսկզբին կազմել են 2 մլն 850 հազար դրամ և 900 դոլար, տարեվերջին՝ 350 հազար դրամ և 900 դոլար։

2024 թվականի հաշվետու տարում նրա կողմից հայտարարագրված եկամուտները կազմել են 18 մլն 214․553 դրամ, որից 13 մլն 291․053 դրամը Հայէկոնոմբանկից վարկերի տեսքով ստացած փոխառությունն է, 1 մլն 999․220 դրամը ԱԺ-ից ստացած աշխատավարձն է, 2 մլն 624․280 դրամը՝ այլ եկամուտը, 300 հազար դրամն էլ՝ Սոցապ նախարարությունից ստացած միանվագ վճարը։

Ստացված վարկերի և փոխառությունների մայր գումարի մնացորդը հաշվետու տարվա դեկտեմբերի 31-ի դրությամբ կազմել է 13 մլն 323․754 դրամ»։

Մանրամասները՝ սկզբնաղբյուր կայքում։