«Թրամփի ուղու» շուրջ աշխատանքներն անցնելու են Հայաստանի տարածքում՝ ԱՄՆ-ի հետ միասին․ Կոնջորյան

ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը Հանրային հեռուստաընկերությանը տված հարցազրույցում խոսել է վաշինգտոնյան հանդիպումների ու համաձայնության մանրամասների մասին:

«Թրամփի ուղու շուրջ աշխատանքներն անցնելու են Հայաստանի տարածքում՝ ԱՄՆ-ի հետ միասին: Դա մի կոմունիկացիոն պրոեկտ է լինելու, որը դառնալու է տարածաշրջանային հաղորդակցության մասշտաբային պրոեկտի մի մասը:

Շատ է խոսվում միջին միջանցքի մասին, դա խոշոր միջազգային պրոեկտ է, որ Չինաստանից Եվրոպա վիթխարի առևտրաշրջանառություն է ապահովելու: Խաղաղության խամերուկը և Թրամփի ուղին դառնալու է այդ պրոեկտի կարևոր օղակ, որտեղից Հայաստանի համար բացվելու են հսկայական տնտեսական և ֆինանսական հնարավորություններ: Հայաստանի համար հոսելու են միջազգային ներդրումներ:

Պատկերացրեք Հայաստանը՝ ներդրողի աչքում. Հայաստանն ու Ադրբեջանը խաղաղություն են կնքել, տարածաշրջանի սահմանները բացվել են, Հայաստանի տարածքում բացվել է Թրամփի ուղի և մարդիկ, ովքեր ուզում են ներդրումներ անել, Հայաստանը որպես հարմար տարբերակ կդիտարկեն»,- ասել է Կոնջորյանը:

Նրա խոսքով՝ Հայաստան են մտնելու միլիարդների ներդրումներ ու քաղաքացիները զգալու են այդ ամենը: