ՊՆ նախարարի խորհրդականի ապօրինի «call centre»-ների հետքերով.Պապիկյանը տեղյա՞կ եղել է Օրդուխանյանի խարդախություններից

ArmLur.am-ը այսօր հայտնել էր, որ Պաշտպանության նախարար Սուրեն Պապիկյանի խորհրդական Արշակ Օրդուխանյանը կալանավորվել է հանցավոր կազմակերպություն ստեղծելու և հափշտակության գործերով։

 

Հիշեցնենք, որ Արշակ Օրդուխանյանը նաեւ ՔՊ կուսակցության անդամ է:

 

ՊՆ նախարարի խորհրդականը, պարզվում է, տեւական ժամանակ զբաղվել է ապօրինի գործունեությամբ, ավելի կոնկրետ՝ հիմնել է զանգերի կենտրոն կամ, այսպես ասած, call center, որը զբաղվել է մարդկանց խաբելով և հեռախոսազանգի միջոցով նրանցից գումար հափշտակելով։

 

ՆԳՆ-ն ևս մանրամասներ էր հայտնել ՊՆ նախարարի խորհրդականի ապօրինի գործունեության բացահայտումից։

 

ՆԳՆ-ի հաղորդմամբ՝ հուլիսի 15-ին Քրեական ոստիկանները բացահայտել են համակարգչային հափշտակություններ կատարող հանցավոր կազմակերպություն: Ըստ ՆԳՆ-ի Երևանի Գարեգին Նժդեհի փողոցի գրասենյակային նշանակության տարածքում Հայաստանի և օտարերկրյա մի խումբ քաղաքացիներ ստեղծել են հանցավոր կազմակերպություն և զբաղվում են համակարգչային հափշտակություններով: 

 

Ամիսներ տևած օպերատիվ-հետախուզական ծավալուն միջոցառումների արդյունքում հնարավոր եղավ պարզել հանցագործությունների կատարման եղանակը, հանցավոր կազմակերպությունում ներգրավված անձանց ինքնությունն ու յուրաքանչյուրի դերակատարումը: 

 

Հուլիսի 1-ին, մանրակրկիտ նախապատրաստումից հետո, Քրեական ոստիկանության և Քննչական կոմիտեի աշխատակիցներն իրականացրին անսպասելի խուզարկություն, և հմուտ գործողությունների արդյունքում հանցավոր կազմակերպության անդամներին չհաջողվեց ոչնչացնել առանցքային ապացուցողական նշանակություն ունեցող էլեկտրոնային տեղեկությունները: Հայտնաբերվել են հանցավոր կազմակերպության անդամաներին պատկանող համակարգչային տեխնիկա և բջջային հեռախոսներ, որոնց հատուկ կահավորանքը պետք է չեզոքացներ իրենց ինքնության բացահայտման ռիսկը: 

 

Հետաքրքիր է, բանակի թալանից հաճախ խոսող ՊՆ նախարար Պապիկյանն արդյո՞ք տեղյակ է եղել, որ խորհրդականն «իր քթի տակ» ապօրինի գործունեությամբ է զբաղվել ու մարդկանցից գումար շորթել:

 

 

Հ․Գ ապօրինի գործունեությամբ զբաղվող call center-ների մոնոպոլիան տարիներ առաջ Վրաստանի նախկին նախարար Դավիթ Կեզերաշվիլիին է եղել։2024թ-ին Ռուսաստանի Դաշնային անվտանգության ծառայությունը դադարեցրել է Վրաստանի պաշտպանության նախկին նախարար Դավիթ Կեզերաշվիլիին պատկանող միջազգային զանգերի կենտրոնների «call centre» ցանցի գործունեությունը: 

 

ԱԴԾ հասարակայնության հետ կապերի կենտրոնի տվյալներով՝ Վրաստանի նախկին նախարարի գործողություններից տուժել էր մոտ 100,000 մարդ ավելի քան 50 երկրներից, այդ թվում՝ ԵՄ-ից, Մեծ Բրիտանիայից, Կանադայից, Բրազիլիայից, Հնդկաստանից և Ճապոնիայից։Գործակալության տվյալներով՝ զանգերի կենտրոնները միջազգային կազմակերպված հանցավոր խմբի մաս էին կազմում և զբաղվում էին խարդախությամբ՝ ներդրումային գործարքների քողի տակ: 

 

ԱԴԾ-ի տվյալներով՝ զանգերի կենտրոնների օրական եկամուտը հասել է 1 միլիոն դոլարի: Խարդախները գործել են Վրաստանի նախկին պաշտպանության նախարար և Milton Group-ի հիմնադիր Դավիթ Կեզերաշվիլիի հովանու ներքո: