Պետք է հաշվի առնել ռուս սահմանապահների ներկայությունը․ ՌԴ ԱԳՆ–ն՝ «Թրամփի ուղու» մասին

Հայաստանի Սյունիքի մարզով անցնող հաղորդակցության ուղիների ապաշրջափակման ժամանակ պետք է հաշվի առնել ռուս սահմանապահների ներկայությունը։ Այս մասին ճեպազրույցի ժամանակ հայտարարել է ՌԴ ԱԳՆ տեղեկատվության և մամուլի դեպարտամենտի փոխտնօրեն Ալեքսեյ Ֆադեևը՝ ի պատասխան օգոստոսի 8-ին Վաշինգտոնում Հայաստանի, ԱՄՆ-ի և Ադրբեջանի ղեկավարների կողմից ստորագրված եռակողմ հռչակագրի վերաբերյալ մեկնաբանություն տալու խնդրանքի։

Նա նշել է, որ Մոսկվան արդիական է համարում Ռուսաստանի, Հայաստանի և Ադրբեջանի ղեկավարների` 2020-22 թվականների եռակողմ համաձայնագրերը, քանի որ կողմերից ոչ մեկը չի հայտարարել այդ համաձայնագրերից դուրս գալու մասին։

Ռուսաստանի արտաքին գործերի նախարարությունը և ղեկավարությունը բազմիցս հայտարարել են, որ Մոսկվան պատրաստ է օգնել իր գործընկերներին հարաբերությունների կարգավորման հարցում։

Ինչ վերաբերում է «Թրամփի ուղուն»՝ Ֆադեևը զերծ է մնացել իր կարծիքից մինչև նախագծի մանրամասների ուսումնասիրությունը, որոնք դեռևս հրապարակված չեն։

«Ինչպես ավելի վաղ նշել էինք, Հարավային Կովկասում արտատարածաշրջանային ուժերի ներգրավումը պետք է առաջ մղի խաղաղության օրակարգը, այլ ոչ թե ստեղծի նոր խնդիրներ և բաժանարար գծեր։ Մենք նաև նշել ենք, որ անհրաժեշտ է հաշվի առնել Հայաստանի անդամակցությունը ԵԱՏՄ-ին և ռուս սահմանապահների ներկայությունը Սյունիքի մարզում։ Մենք կարծում ենք, որ սա պետք է հաշվի առնվի նախագծի մանրամասները մշակելիս», - ասել է Ֆադեևը։