Նույն բնակարանից 3-րդ անգամ գողություն կատարած երիատասարդին գտել ու ձերբակալել են

Օգոստոսի 9-ի գիշերը Արմավիր քաղաքի Բաղրամյան փողոցի առանձնատներից մեկից կատարված գողության վերաբերյալ հաղորդում չեղավ, սակայն Քրեական ոստիկանության Արմավիրի մարզային վարչության ծառայողները երկու օր անց դրա մասին ստացան օպերատիվ տեղեկություն: ՆԳՆ ոստիկանությունից հայտնում են՝ առանց փաստարկ բերելու, թե ինչու չի դիմել իրավապահներին` տանտիրուհին այնուամենայնիվ հաղորդում է տվել։

Նախաձեռնվել է քրեական վարույթ, և հետագա գործողություններով հիմնավորվել է, որ օգոստոսի 9-ի գիշերը` ժամը 3-ի սահմաններում, նույն` Բաղրամյան փողոցում բնակվող 19-ամյա մի երիտասարդ, անցնելով դարպասի վրայով` ապօրինի մուտք է գործել բակ և օգտվելով մուտքի դուռը կողպված չլինելու և բնակարանատիրոջ ու նրա դստեր քնած լինելու հանգամանքներից, մտել ու գաղտնի հափշտակել է վերջինիս բջջային հեռախոսը և բանկային քարտը։ Պարզվել է նաև, որ նա բջջային հեռախոսը 10 հազար դրամով վաճառել է, իսկ քարտով գումար կանխիկացնելու անհաջող փորձերից հետո` կոտրել այն:

Օգոստոսի 11-ին` ժամը 18.30-ին, երիտասարդը ձերբակալվել ու տեղափոխվել է Արմավիրի մարզային վարչություն, ապա խոստովանել է արարքը։ Գողոնը հայտնաբերվել է։
Պարզվել է նաև, որ հուլիսի վերջին նա ևս երեք անգամ, գիշերվա գրեթե նույն ժամին ու նույն կերպ, մտել է նույն բնակարան: Առաջին անգամ նա հափշտակել է 70 հազար դրամ, երկրորդ անգամ` յոթ հազար դրամ ու բանկային երկու քարտ, որոնք նույնպես կոտրել է` գումար կանխիկացնել չկարողանալուց հետո, իսկ երրորդ անգամ հեռացել է ձեռնունայն:
Նախաքննությամբ հանգամանքները պարզվում են: