Թրամփը բացահայտել է Կիևին անվտանգության երաշխիքներ տրամադրելու իր պայմանը

Ուկրաինայի և եվրոպական երկրների ղեկավարների հետ առցանց հանդիպման ժամանակ ԱՄՆ նախագահ Դոնալդ Թրամփը հայտարարել է Կիևին անվտանգության երաշխիքներ տրամադրելու իր պատրաստակամության մասին՝ այն պայմանով, որ դրանք չեն իրականացվի ՆԱՏՕ-ի շրջանակներում: Այս մասին հայտնել է Politico թերթը՝ հղում անելով երեք աղբյուրի:

«ԱՄՆ-ն պատրաստ է որոշակի դեր խաղալ Կիևին ռուսական ապագա ագրեսիան զսպելու միջոցներ տրամադրելու գործում, եթե հրադադար կնքվի: Թրամփը նշել է, որ նման պարտավորություն կստանձնի միայն այն դեպքում, եթե այդ ջանքերը չիրականացվեն ՆԱՏՕ-ի շրջանակներում», - ասել են աղբյուրները:

Այնուամենայնիվ, Թրամփը չի մանրամասնել, թե ինչ ի նկատի ունի երաշխիքներ ասելով: Ավելի վաղ նա հայտարարել էր, որ ԱՄՆ-ն ուղղակիորեն զենք չի մատակարարի Կիևին, և եվրոպական պետությունները կֆինանսավորեն այդ մատակարարումները ՆԱՏՕ-ի միջոցով՝ արդեն կնքված համաձայնագրի շրջանակներում: Բրիտանացի պաշտոնյայի խոսքով՝ Թրամփը գիտակցում է, որ ամերիկյան անվտանգության երաշխիքները պետք է լինեն հակամարտության վերջնական կարգավորման մաս, և կարծում է, որ ԱՄՆ-ն կխաղա իր դերը այս գործում:

Քննարկումը տեղի է ունեցել չորեքշաբթի օրը Գերմանիայում կազմակերպված վիրտուալ հանդիպման շրջանակներում, որը նպատակ ուներ համակարգել ԱՄՆ-ի և եվրոպական երկրների դիրքորոշումները՝ ուրբաթ օրը Ալյասկայում կայանալիք ԱՄՆ-Ռուսաստան գագաթնաժողովից առաջ: