Հայտնի է Իրանի նախագահի՝ Հայաստան այցի նպատակը

Իրանի ԱԳ նախարար Աբբաս Արաղչին «Դիվանագիտության սեղան» ծրագրում  անդրադարձել է տարածաշրջանային վերջին զարգացումներին։

Նա նշել է, որ Նախիջևանի և Ադրբեջանի մայրցամաքային մասի միջև կապի հարցը վերջին տարիներին ռազմավարական և զգայուն խնդիր է առաջացրել:

«Սա մեծ մտահոգություններ է առաջացրել ինչպես մեր, այնպես էլ՝ տարածաշրջանի մյուս երկրների համար, աշխարհաքաղաքական փոփոխությունների հավանականության պատճառով»,- ասել է նա։

Ըստ Արաղչիի՝ հիմնական մտահոգությունն այն է, որ այս խնդրի պատճառով տարածաշրջանում տեղի ունենան աշխարհաքաղաքական փոփոխություններ․ «Ի՞նչ նկատի ունենք աշխարհաքաղաքական փոփոխություններ ասելով: Միջազգայնորեն ճանաչված սահմանների փոփոխություն, սահմանների տեղաշարժ, տարածաշրջանի երկրների ինքնիշխանության և տարածքային ամբողջականության խախտում, օրինակ, Հայաստանի տարածքի մի մասի օգտագործում, որը կարող է հանգեցնել օկուպացիայի, սահմանների փոփոխության կամ ինքնիշխանության թուլացման: 

Մենք նախօրոք պարզ հայտարարել ենք, որ նման բան չենք հանդուրժի, և մեր քաղաքականությունը միշտ եղել է հստակ: Մենք գործողություններ ենք ձեռնարկել՝ ցույց տալու մեր վճռականությունը: Ներկայումս մեր դիրքորոշումը նույնն է՝ մենք չենք ընդունում տարածաշրջանում աշխարհաքաղաքական փոփոխությունները»:

Արաղչին ասել է, որ  Հայաստանի և Ադրբեջանի միջև ստորագրվել է հայտարարություն, որտեղ հստակ նշվում է, որ երկու կողմերն ընդունում են տարածաշրջանի սահմանների անփոփոխելիությունը. «Այս առումով, ներկայումս մեր աշխարհաքաղաքական մտահոգությունները ժամանակավորապես, կարծես, լուծված են: Սակայն, թե որքանով կպահպանվեն այդ պարտավորությունները, կամ ինչպիսին կլինեն հետագա զարգացումները, մենք, անշուշտ, կհետևենք դրանց»: 

Արաղչիի խոսքով՝ տնտեսական առումով այս ճանապարհը կարող է որոշակի վնասներ պատճառել Իրանին, քանի որ այն կարող է նվազեցնել այդ երկրի տարածքով անցնող տրանզիտային ճանապարհի կարևորությունը. «Սակայն դա կախված է մեզանից՝ ինչպես բարձրացնենք այդ ճանապարհի գրավչությունը, որպեսզի ավելի մեծ տրանսպորտային հոսքեր անցնեն դրա միջով»:

«Բայց մենք չենք կարող արգելել որևէ երկրի՝ իր տարածքում ճանապարհ կառուցել, քանի դեռ այդ ճանապարհը գտնվում է Հայաստանի լիակատար ինքնիշխանության և օրենսդրության ներքո: Միջազգային իրավունքի տեսանկյունից մենք չենք կարող առարկություններ ներկայացնել»,- ասել է նա:

Արաղչիի խոսքով՝ Իրանի նախագահի Հայաստան այցի նպատակը Հարավային Կովկասի աշխարհաքաղաքական քարտեզի անփոփոխության ապահովումն է։

Նա նշել է, որ նախագահ Փեզեշքիանի այցը Երևան հնարավորություն կտա վերահաստատել Իրանի մտահոգությունները, այն է՝ «տարածաշրջանի աշխարհաքաղաքականության մեջ որևէ փոփոխություն տեղի չունենա, օտարերկրյա ուժեր չմտնեն տարածաշրջան»։