Ես աշխարհի և պատմության միակ վարչապետն եմ, ով իր քաղաքացիներին կոչ է անում հեղափոխություն անել․ Փաշինյան

Իմ՝ որպես վարչապետ, փորձառության և վերլուծության հետևությունն այն է, որ չպետք է շարունակենք ղարբաղյան շարժումը։ Ես հայտարարել եմ, որ այդ ուղեգծով եմ առաջնորդելու ՀՀ–ն, և եթե ՀՀ քաղաքացիները համարում են, որ այդպես չպիտի լինի, ինքս քաղաքացիներին կոչ եմ անում հեղափոխություն անել։ Այս մասին Կառավարության նիստից հետո լրագրողների հետ զրույցում ասաց ՀՀ վարչապետ Նիկոլ Փաշինյանը։

«Ես աշխարհի և պատմության միակ վարչապետն եմ, ով իր քաղաքացիներին կոչ է անում հեղափոխություն անել, եթե հչակված ռազմավարության հետ համաձայն չեն, բայց չարեցին այդ հեղափոխությունը, որովհետև հասկացան, որ առանց այդ որոշման կայացնելու խաղաղությունը ոչ տեսականորեն, ոչ գործնականում հնարավոր չէ»,– ասաց նա՝ նշելով, որ քաղաքացիները հասկացան՝ առանց այդ որոշման խաղաղություն հնարավոր չէ։

Փաշինյանի խոսքով՝ այլոց ընկալումը ղարաբաղյան շարժման վերաբերյալ այլ է եղել, նրանք համարել են, որ դա շատ հարմար լծակ է, որպեսզի Հայաստանի ինքնիշխանությունը, պետականությունը, բարեկեցությունը չկայանա․ «Այդ լծակը արդյունավետ օգտավործվել է։ Հիմա եկել է խաղաղության ժամանակաշրջանը։ Եվ թույլ տվեք ասել՝ ՀՀ քաղաքացիները գոհունակությամբ են ընդունել խաղաղության հաստատման փաստը։ Եվ դա հաստատող բազմաթիվ տվյալներ կան, դա հերքող ոչ մի փաստ չկա»։

Նրա խոսքով՝ քաղաքացիները պետք է առաջիկա ընտրություններում ընտրություն կատարեն խաղաղության և ոչ խաղաղության միջև։

Անդրադառնալով սահմանադրական փոփոխություններին՝ Փաշինյանը նշեց․ «Խաղաղության համաձայնագրի վավերացման գործընթացում եթե մեր Սահմանադրական դատարանը կորոշի, որ հիմա նախաստորագրված և արդյունքում ստորագրված խաղաղության համաձայնագիրն ունի հակասություններ Սահմանադրության հետ, ես ինքս կնախաձեռնեմ սահմանադրական փոփոխություններ»։

«Այս պահին դրա մասին մտածելու անհրաժեշտություն և կարիք չկա, բայց մենք ունենք նոր Սահմանադրություն ընդունելու օրակարգ»,- հավելել է նա: