Այսպիսով՝ հարկային տեռորը հայտարարում եմ փակված, կարևորը, որ չեմ հայտարարում բացված. Նիկոլ Փաշինյանը

«Սոցիալական ցանցերում գրառումներ էին արվում, նամակներ էինք ստանում, թե կառավարությունը հարկային տեռոր է սկսել բիզնեսների նկատմամբ»,-կառավարության նիստում հայտարարեց Նիկոլ Փաշինյանը՝ նշելով, որ դրան արձագանքել են, ասելով՝ թե տնտեսությունը տեռոր անելու ցանկություն չունեն։

Նա նշեց, որ տնտեսությանը քաջալերելուն ուղղված տասնյակ միլիարդների ծրագրեր են իրականացնում։

«Այսօր ընկերություն չկա, որ մեր աջակցությամբ մի մեքենա, սարքավորում կամ արտոնյալ վարկ վերցրած չլինի և այլն ու այսպես շարունակ։ Բայց մյուս կողմից մենք բիզնեսից ակնկալում ենք հարկային պարտաճանաչություն, որ իրենք իրենց հարկերը վճարեն։ Ոչ մի լումա ավել մենք չենք ակնկալում, բայց նաև՝ ոչ մի լումա պակաս»,- հայտարարեց Փաշինյանը։

Նա պատմեց, որ օրենքի փոփոխության են հանգել Ջերմուկում նախորդ տարի գործարարների հետ կազմակերպած աշխատաժողովի ժամանակ։

 «Այսպիսով հարկային տեռորը հայտարարում եմ փակված, կարևորը, որ չեմ հայտարարում բացված։

Մինչ այդ ՊԵԿ նախագահ Էդուարդ Հակոբյանը զեկուցեց «Հայաստանի Հանրապետության հարկային օրենսգրքում փոփոխություններ կատարելու մասին», «Հայաստանի Հանրապետության քրեական օրենսգրքում փոփոխություն կատարելու մասին» և «Հայաստանի Հանրապետության քրեական դատավարության օրենսգրքում լրացում կատարելու մասին» Հայաստանի Հանրապետության օրենքների նախագծերին հավանություն տալու և անհետաձգելի համարելու մասին որոշումը։

Նախագծի Հիմնավորման մեջ ասվում է. 

«Այս փոփոխությունների հիմքում ընկած է հետևյալ միասնական տրամաբանությունը, ըստ որի` հարկային մարմինը ՀՀ քրեական օրենսգրքի 290-րդ հոդվածով նախատեսված արարքի առերևույթ հատկանիշներ հայտնաբերելու դեպքում պետք է սեփական գործիքակազմով և միջոցներով հավաստվի հայտնաբերված իրավախախտման հատկանիշների իսկության և հավաստիության մեջ, դրա` ՀՀ քրեական օրենսգրքի 290-րդ հոդվածով նախատեսված արարքի հատկանիշներին համապատասխանելուն, որից հետո միայն միջոցներ ձեռնարկի այդ փաստի վերաբերյալ հաղորդումներ ներկայացնելու կապակցությամբ:

Գործնականում խնդիրներ են առաջանում այն դեպքերում, երբ հարկային մարմնի կողմից արձանագրված հանգամանքներին կարող է տրվել միայն ՀՀ քրեական օրենսգրքի 290-րդ հոդվածով նախատեսված արարքին համապատասխանելու նախնական իրավական գնահատական։ Նման իրավիճակներում քրեական վարույթի նախաձեռնումը հաճախ իրականացվում է վարչական ակտի վիճարկման կամ բողոքարկման ընթացակարգերը դեռևս չավարտված պայմաններում, ինչը հանգեցնում է վարչական և քրեական վարույթների զուգահեռ իրականացման, իրավական անորոշության, ուստի եթե հաղորդումը վերաբերում է հարկային մարմնի վարչական ակտով արձանագրված հանգամանքներին, ապա քրեական վարույթ նախաձեռնելու պարտականություն կառաջանա միայն այն դեպքում, երբ տվյալ վարչական ակտը մտել է ուժի մեջ և սպառվել են վարչական բողոքարկման ընթացակարգերը՝ անկախ դատական կարգով բողոքարկվելու հանգամանքից, այսինքն՝ վարչական ակտը կամ չի բողոքարկվել վերադասության կարգով, կամ բողոքարկվել է, սակայն շեմը գերազանցող մասով մնացել է անփոփոխ՝ բացառությամբ այն դեպքերի, երբ հարկային մարմնի կողմից բացահայտված հանգամանքները դեռևս վարչական ակտով չեն արձանագրվել, սակայն հարկային մարմնի լիազորված պաշտոնատար անձի հաղորդմամբ հիմնավորվում է քրեական վարույթի անհապաղ նախաձեռնելու անհրաժեշտությունը՝ ապացույցների պահպանման, թվային տվյալների հայտնաբերման կամ անհետաձգելի ապացուցողական գործողությունների իրականացման նպատակով, և առկա է ողջամիտ կասկած, որ հապաղումը կարող է հանգեցնել ապացույցների կորստի, ոչնչացման կամ թաքցման։

Նման կարգավորումը նպատակ է հետապնդում հարկային մարմնի կողմից ներկայացվող հանցանքի վերաբերյալ հաղորդումներում տեղ գտած հանգամանքների առավել ամբողջական և հիմնավոր ներկայացում` բացառելով այն դեպքերը, երբ հարկային մարմնի մի պաշտոնատար անձ վարչական ակտով ապացուցված է համարել որոշակի փաստական հանգամանքներ, բայց հետագայում այդ ակտի վիճարկման արդյունքում հարկային մարմնի բողոքարկման հանձնաժողովի կողմից այդ ճանաչվել է անվավեր կամ փոփոխվել են դրանում արտացոլված հանգամանքներն այն կերպ, որ այլևս բացառվել է վարչական ակտում տեղ գտած փաստերի կապակցությամբ հաղորդում ներկայացնելը:

Նկարագրված իրավիճակում վարչական բողոքարկման ընթացակարգը հանդիսանում է հարկային վեճի բնական և նախնական փուլը։ Հետևաբար` քանի դեռ չի ավարտվել այս նախնական փուլը, նպատակահարմար չէ ստեղծել այնպիսի նախադրյալներ, որոնք հիմք կլինեն դրան զուգահեռ ու նույն փաստերի կապակցությամբ քրեական վարույթներ իրականացնելուն:

Այսպիսով, «Հայաստանի Հանրապետության հարկային օրենսգրքում փոփոխություններ կատարելու մասին» նախագծի ընդունումը պայմանավորված է հարկային վարչարարության իրավական հստակության բարձրացման և հարկային հսկողության արդյունավետության ապահովման անհրաժեշտությամբ։  

2) ՀՀ քրեական օրենսգրքի 290-րդ հդվածի (Հարկերը, տուրքերը կամ այլ վճարներ չվճարելը) 4-րդ մասի համաձայն՝ նույն հոդվածում խոշոր չափ է համարվում 10 միլիոն Հայաստանի Հանրապետության դրամը գերազանցող գումարը, իսկ առանձնապես խոշոր չափ՝ 20 միլիոն Հայաստանի Հանրապետության դրամը գերազանցող գումարը:

«Հայաստանի Հանրապետության քրեական օրենսգրքում փոփոխություն կատարելու մասին» օրենքի նախագծով նախատեսվում է, որ նույն հոդվածում խոշոր չափ է համարվում մեկ հարկային տարվա ընթացքում 30 միլիոն Հայաստանի Հանրապետության դրամը գերազանցող հարկերի, տուրքերի կամ այլ վճարների գումարը, կամ իրար հաջորդող երկու հարկային տարիների ընթացքում 45 միլիոն Հայաստանի Հանրապետության դրամը գերազանցող հարկերի, տուրքերի կամ այլ վճարների գումարը, իսկ առանձնապես խոշոր չափ՝ մեկ հարկային տարվա ընթացքում 50 միլիոն Հայաստանի Հանրապետության դրամը գերազանցող հարկերի, տուրքերի կամ այլ վճարների գումարը, կամ իրար հաջորդող երեք հարկային տարիների ընթացքում 75 միլիոն Հայաստանի Հանրապետության դրամը գերազանցող հարկերի, տուրքերի կամ այլ վճարների գումարը»։