Կիբեռանվտանգության փորձագետը ներկայացրել է խարդախների ամենատարածված հնարքները

Հեռախոսային և առցանց խարդախներն ամենից հաճախ ներկայանում են բանկերի, իրավապահ մարմինների կամ պետական գերատեսչությունների աշխատակիցների անունից։ Այս մասին RT-ին տված հարցազրույցում հայտնել է Runet վերլուծական պարբերականի գլխավոր խմբագիր, կիբեռանվտանգության փորձագետ Վլադիմիր Զիկովը։

Նրա խոսքով՝ խարդախները հաճախ ներկայանում են բանկերի, ՆԳՆ-ի, ԱԴԾ-ի, «Ռոսֆինմոնիթորինգի», «Ռոսկոմնադզորի», ինչպես նաև պոլիկլինիկաների, կապի օպերատորների, առաքման ծառայությունների և կառավարող ընկերությունների աշխատակիցների անունից։ Փորձագետը նշել է, որ նրանք հաճախ օգտագործում են համացանց արտահոսած անձնական տվյալները՝ զոհի անունը, ծննդյան ամսաթիվը, հասցեն և այլ տեղեկություններ, որպեսզի վստահություն ներշնչեն։

Զիկովի խոսքով՝ խարդախության սխեմաներում հաճախ ներգրավված են մի քանի կեղծ «աշխատակիցներ»։ Սկզբում զանգահարողը կարող է ներկայանալ, օրինակ, որպես պոլիկլինիկայի ներկայացուցիչ և խնդրել հայտնել հաղորդագրությամբ ստացված հաստատման կոդը։ Այնուհետև զոհի հետ կապ է հաստատում մեկ այլ անձ՝ ներկայանալով բանկի, «Գոսուսլուգի» կամ պետական այլ կառույցի աշխատակից, և պնդում, թե այդ կոդի միջոցով հանցագործները հասանելիություն են ստացել բանկային հաշվին։ Վերջում կապվում է ևս մեկ կեղծ «իրավապահ», որը համոզում է գումարը փոխանցել իբր անվտանգ հաշվեհամարի կամ կանխիկ փոխանցել սուրհանդակին։ Փորձագետը շեշտել է, որ նման բոլոր գործողությունների վերջնական նպատակը քաղաքացիներից գումար հափշտակելն է։