Իլոն Մասկը հրաժարվում է արգելափակել ռուսական լրատվամիջոցները Starlink-ում

Աշխարհ 6 Մարտ, 2022 16:51

Tesla-ի և SpaceX-ի ղեկավար Իլոն Մասկը հրաժարվել է արգելափակել Starlink արբանյակային ինտերնետային ցանցի ռուսական լրատվական աղբյուրները։ Միլիարդատերն իրեն անվանել է «խոսքի ազատության առումով բացարձակ» և ասել, որ դա կանի միայն «զենքի սպառնալիքով»։

Մասկը թվիթերում գրել է, որ «որոշ» երկրների կառավարություններ իրեն խնդրել են սահմանափակել Starlink-ով ռուսական լրատվամիջոցների մուտքը։

Սակայն դրանց թվում չի եղել Ուկրաինան, որտեղ փետրվարի 24-ից ռուսական ռազմական գործողություն է իրականացվում։

«Որոշ կառավարություններ (ոչ թե Ուկրաինան) ասացին Starlink-ին արգելափակել ռուսական լրատվական աղբյուրները: Մենք դա չենք անի, բացառությամբ զենքի սպառնալիքի: Կներեք, բայց ես խոսքի ազատության առումով բացարձակ մարդ եմ», - ասաց ձեռնարկատերը:

Միևնույն ժամանակ Մասկը նախազգուշացրել է SpaceX-ի առաջնահերթությունների փոփոխության մասին. ընկերությունը կենտրոնանալու է կիբեր պաշտպանության և ազդանշանային միջամտության հաղթահարման վրա: Դա «թեթև ուշացումներ» կառաջացնի Starship հրթիռի և Starlink V2 արբանյակների արձակման հարցում, ասել է նա։

Ուկրաինայի շուրջ ստեղծված իրավիճակի ֆոնին մի շարք արևմտյան երկրներ հեռարձակման ցանցից հեռացրել են ռուսական պետական լրատվամիջոցներին։ Մասնավորապես, Russia Today-ի և Sputnik-ի ազդանշանի և բովանդակության տարածումն արգելվել է Եվրամիության կողմից։ Բացի այդ, հեռուստաալիքները և լրատվական գործակալությունների հավելվածները հեռացվել են App Store և Google Play խանութներից, իսկ YouTube-ն արգելափակել է նրանց ալիքները։