Միջազգային ավիաընկերությունները «քաոսի» մեջ են. Reuters

Միջազգային ավիաընկերությունները բախվել են թռիչքների խափանումներին այն բանից հետո, երբ Իրանը հարվածեց Իսրայելին, գրում է Reuters-ը։

Ավելի քան 300 հրթիռներով և անօդաչու սարքերով Իսրայելի վրա Իրանի հարձակումը, որոնց մեծ մասը խոցվել է ԱՄՆ-ի կողմից աջակցվող Իսրայելի հակաօդային պաշտպանության կողմից, «քաոս է առաջացրել ավիացիոն արդյունաբերության մեջ», - նշում է գործակալությունը:

Ավելի քան մեկ տասնյակ ավիաընկերություններ ստիպված են եղել չեղարկել թռիչքները կամ փոխել երթուղիները վերջին երկու օրվա ընթացքում, այդ թվում՝ Qantas-ը, Lufthansa-ն, United Airlines-ը և Air India-ն:

Սա նոր հարված է ավիացիոն ոլորտին, որը նախկինում բախվել է բազմաթիվ սահմանափակումների՝ Իսրայելի և ՀԱՄԱՍ-ի միջև հակամարտությունների, ինչպես նաև Ուկրաինայի պատերազմի պատճառով։

Իրանի օդային տարածքն օգտագործվում է ավիաընկերությունների կողմից Եվրոպայի և Ասիայի միջև թռչելու համար, և այդ փոխադրողները կարող են սահմանափակվել երկու այլընտրանքային երթուղիներով՝ կա՛մ Թուրքիայով, կա՛մ Եգիպտոսով և Սաուդյան Արաբիայով:

Մերձավոր Արևելքի խոշորագույն ավիաընկերությունները, ներառյալ Emirates Airlines-ը, Qatar Airways-ը և Etihad Airways-ը, կիրակի օրը հայտարարել են, որ կվերսկսեն իրենց գործունեությունը տարածաշրջանում՝ որոշ չվերթներ չեղարկելուց կամ փոխելուց հետո: