Նիդերլանդների քաղաքում կայացել է Սբ․ Գր․ Լուսավորիչ եկեղեցու օծման 20-ամյակի տոնակատարությունը

Նիդերլանդների Ալմելո քաղաքում Սուրբ Գրիգոր Լուսավորիչ Եկեղեցու ծուխը և տեղի հայ համայնքը մեծ շուքով նշեցին եկեղեցու օծման 20-ամյակը: Առաջին եկեղեցին հիմնադրվել էր 1991 թվականին՝ համայնքի նվիրատվությամբ գնված մանկապարտեզի շենքում: Հետագայում, այդ շենքի վաճառքից ստացված գումարը և համայնքի հավաքած հանգանակությունը թույլ տվեցին 2002 թվականին նախաձեռնել նոր Սուրբ Գրիգոր Լուսավորիչ եկեղեցու կառուցումը։ Այն օծվեց 2003 թ․աշնանը։ 

«Այսպես, երեկ կիրակի օրը, որ նաև Խաչվերացի տոնն էր, Արևմտյան Եվրոպայի հայրապետական պատվիրակ Տեր Խաժակ Արքեպիսկոպոս Պարսամյանի նախագահությամբ Ալմելոյի Ս․ Գրիգոր Լուսավորիչ եկեղեցում մատուցվեց Ս․ Պատարագ։ Պատարագիչը Ռումինիայի թեմի առաջնորդ և Բուլղարիայի թեմի առաջնորդական տեղակալ Տեր Տաթև Եպիսկոպոս Հակոբյանն էր, որը որպես Արևմտյան Եվրոպայի նախկին հայրապետական պատվիրակի փոխանորդ երկար տարիներ եղել էր եկեղեցու հոգևոր հովիվ։

Սուրբ պատարագին, որին մասնակցում էր շուրջ 1000 հայ հավատավոր, ներկա էին Նիդերլանդներում ՀՀ դեսպան Վիկտոր Բիյագովը, ինչպես նաև ղպտի և ասորի եկեղեցիների հոգևորականներ։ Արարողության ընթացքում ընթերցվեց Գարեգին Բ Ամենայն Հայոց Կաթողիկոսի սրբատառ կոնդակը՝ նվիրված եկեղեցու 20-ամյա հոբելյանին, որով Վեհափառ Հայրապետը իր օրհնությունն ու շնորհավորանքները փոխանցեց հոգևոր հովվին, ծխական խորհրդի անդամներին և բոլոր ծխականներին։

Հավատացյալներին իր քարոզը փոխանցեց Տ․ Խաժակ Արք․ Պարսամյանը։ Պատարագի ավարտին կատարվեց մատաղի օրհնության կարգը, իսկ Խաչվերացի տոնի առիթով օրհնվեց Սուրբ Խաչը զարդարող ռեհանը։

Տոնական միջոցառումների շրջանակում, եկեղեցական արարողությունից հետո, շուրջ 800 հոգի հավաքվեցին սիրո սեղանի շուրջ, որը ուղեկցվում էր տոնական հանդիսությամբ։ Միջոցառումը բացեց ծխական խորհրդի ատենապետ տիար Օննիկ Գելիջին՝ շնորհավորանքի խոսքով։

Հանդիսության ընթացքին, որը հմուտ կերպով վարում էին երկու երիտասարդներ, բեմում իրար հաջորդեցին՝ գնահատագրեր և հուշանվերներ ստանալու հաճելի առիթով՝ այն անձինք, ովքեր իրենց կարևոր ներդրումն ու աջակցությունն էին ցուցաբերել ծխական համայնքի հիմնադրման և հետագայում եկեղեցու կառուցման գործում, ինչպես նաև ներկայիս ծխական համայնքը գլխավորող նվիրյալ հայորդիներ։ Իսկ տիար Օննիկ Գելիջին արժանացավ պատվավոր «Ս․ Գրիգոր Լուսավորիչ» բյուրեղյա մրցանակի։

Խաժակ Արք․ Պարսամյանը իր խոսքում ընդգծեց, որ 20-ամյա հոբելյանը հրաշալի հնարավորություն է՝ հիշելու անցյալը, տոնելու ներկան և ծրագրելու ապագան։ Անդրադառնալով անցյալին՝ նա բարձր գնահատեց այն մարդկանց, ովքեր տեսիլք ունեին եկեղեցի կառուցելու և նրանց, ովքեր վերջին 20 տարիների ընթացքում անընդմեջ բաց են պահել եկեղեցու դռները՝ ապահովելով Հայ Եկեղեցու առաքելության շարունակականությունը։ Նա շնորհակալություն հայտնեց հոգևորականներին, ծխական խորհրդի, տիկնանց միության անդամներին, դպրոցի ուսուցիչներին և համայնքային կազմակերպությունների ներկայացուցիչներին»,- ասվում է հաղորդագրության մեջ։

Այնուհետև Սրբազան Հայրը անդրադարձել է ապագային՝ ուրախությամբ նշելով, որ տոնական միջոցառմանը երիտասարդների մեծ մասնակցությունը վկայում է այն մասին, որ Սուրբ Գրիգոր Լուսավորիչ եկեղեցու ծուխը ունի բարգավաճ ապագայի ամենակարևոր երաշխիքը։ Նա քաջալերել է երիտասարդներին իրենց լիարժեք մասնակցությունը բերել ծխի կառավարմանը՝ նպաստելով դրա հետագա զարգացմանն ու զորացմանը։ 

Իր խոսքի ավարտին, Սրբազանը կրկին ջերմորեն շնորհավորել է եկեղեցու հոգևորականներին, նախկին և ներկա եկեղեցական խորհուրդների անդամներին, ինչպես նաև բոլոր նրանց, ովքեր տարիներ առաջ մասնակցել են եկեղեցու կառուցման համար իրականացվող հանգանակության արշավին և կամավորական աշխատանքներին՝ բարձր գնահատելով նրանց անձնվիրությունը։ 

Այս թեմայով «Ես սատանիստ եմ, ինձ չեն կարող հրավիրել». ՔՊ-ականը՝ եկեղեցու վերաօծմանը մասնակցելու մասին Արմեն Գրիգորյանն ընդունել է Նիդերլանդների Թագավորության նորանշանակ դեսպան Մարիկե Մոնրոյ-Վինթերին Նիդերլանդների Սուրբ Գրիգոր Լուսավորիչ եկեղեցում Խաչվերացի տոնին պատարագ է մատուցվել Հայաստանի և Տաջիկստանի արտաքին գործերի նախարարությունների միջև կայացել են քաղաքական խորհրդակցություններ Կայացել է «Մեդալի հակառակ կողմը» ֆիլմի պրեմիերան (լուսանկարներ) Հայ բռնցքամարտիկները հաջող մրցելույթներ են ունեցել Վրաստանի Գորի քաղաքում 10 հազար դրամանոց սրբապղծություն՝ ընդդեմ հայ առաքելական եկեղեցու. «Ժողովուրդ» ՍԴ նախագահն առանձնազրույց է ունեցել ՀՀ-ում Նիդերլանդների նորանշանակ դեսպանի հետ Համերգային շրջագայություն՝ Շառլ Ազնավուրի 100-ամյակի շրջանակում Գլենդելի հայկական եկեղեցու նկուղում Բինգո խաղամոլների ակումբ է գործում