Զինապարտության օրենքի փոփոխությամբ զինծառայությունից խուսափողներն արտերկիր սովորելու չեն մեկնի. հակադիր կարծիքներ

«Զինապարտության մասին» օրենքի փոփոխման գլխավոր նպատակն է փակել բոլոր այն դռները, որոնցով երիտասարդները փորձում են խուսափել ծառայությունից: Կրթության և գիտության նախարարությունում վստահ են, որ օրենքի փոփոխությունները չեն սահմանափակում կրթության իրավունքը: «Մենք պետք է տարանջատենք կրթության իրավունքը և պետության նկատմամբ պատասխանատվությունը: Եթե դու ընտրում ես պետության առաջարկած կրթաթոշակային ծրագիր, պարտավոր ես հաշվի նստել պետության կանոնների հետ»,-«Մեդիա կենտրոնում» կայացած քննարկման ժամանակ ասաց ՀՀ կրթության և գիտության նախարարության արտաքին կապերի և սփյուռքի վարչության պետ Տիգրան Սահակյանը' հավելելով, որ նախարարության առաջնահերթ խնդիրը կրթություն ստանալն առաջնային նպատակ դարձնելն է:

Սահակյանի խոսքով` բազմաթիվ երիտասարդներ ձգտում են ամենատարբեր կրթաթոշակների ոչ թե կրթություն ստանալու, այլ զինվորական ծառայությունից խուսափելու համար: «Տարեկան շուրջ 200 երիտասարդ է դիմում կրթական ծրագրերի, նրանց 90 տոկոսը զինապարտ համարվող արական սեռի ներկայացուցիչներ են, որոնց մի մասը կրթություն ստանալուց հետո Հայաստան չի վերադառնում: Զինապարտության օրենքի փոփոխությամբ` սահմանվում են որոշակի պահանջներ, որպեսզի նրանք անպայման վերադառնան հայրենիք»,-ասաց Սահակյանը:

Քննարկման մեկ այլ մասնակցի' պատմական գիտությունների թեկնածու, դոցենտ Հովհաննես Հովհաննիսյանի համոզմամբ` «Զինապարտության մասին» օրենքի փոփոխության նպատակը հստակ չէ, արդարության սկզբունքն էլ չի վերականգնվում: Ինչ վերաբերում է գրավին, ապա 8.5 միլիոն դրամը ողջամիտ չափ չէ: «Եթե մարդը որոշել է չվերադառնալ, արտասահմանում կտեղավորվի աշխատանքի, կուղարկի այդ գումարը շատ արագ վաստակելով: Եթե մարդը որոշել է սովորել և գիտությամբ զբաղվել, ավելի լավ չէ՞ գումար վճարեն, այդ գումարով էլ պետությունը երկու պրոֆեսիոնալ զինվորականի կվճարի, ովքեր կպաշտպանեն սահմանը»,-առաջարկեց Հովհաննիսյանը' ինչին ի պատասխան Տիգրան Սահակյանը հիշեցրեց, որ երկիրը պատերազմական վտանգի առաջ է կանգնած, և, հետևաբար, բոլոր գերատեսչությունների թիվ մեկ խնդիրը հայոց բանակն է:

«Զինապարտության մասին» օրենքի փոփոխված տարբերակը ստեղծում է անհավասար պայմաններ, նպաստում կոռուպցիայի զարգացմանն ու արդարությունը ոտնահարվում է: «Մխիթար Սեբաստացի» կրթահամալիրի տնօրեն Աշոտ Բլեյանի մեկնաբանությամբ' օրենքում կան երկակի ստանդարտներ և խելացի երիտասարդի փոխարեն, զինվորական ծառայությունից էլի կխուսափեն մեծահարուստների որդիները, ովքեր առանձնապես գիտությամբ զբաղվելու ցանկություն չունեն: «Մի խոչընդոտեք կրթություն ստանալու իրավունքին»,-ասաց Աշոտ Բլեյանը:

Նա առաջարկեց, որ 18 տարին լրացած արական սեռի բոլոր ներկայացուցիչներն, ովքեր չունեն առողջական խնդիր, ծառայեն զինված ուժերում, հետո կրթություն ստանան և զբաղվեն գիտությամբ: «Նախ զինվորական ծառայություն, հետո նոր կրթությունը: Սա կլինի արդար մոտեցում և հարուստների որդիներն էլ կրթություն ստանալու դիմակի տակ ծառայությունից չեն խուսափի»,-ասաց Բլեյանը:

Տիգրան Սահակյանի խոսքին, որ ուսանողների մեջ հանդիպում են բացառիկ խելացի երիտասարդներ, ովքեր անպայման պետք է սովորեն արտերկրում, Բլեյանը հակադարձեց, որ երկու տարի բանակում ծառայելուց որևէ երիտասարդի տաղանդ չի մարել: «Ընդհակառակը հայրենիքին պարտքը մատուցած երիտասարդը կդասավորի սեփական կյանքն ու իրեն պետությանը արժանի քաղաքացի կզգա: Պետք է այս երկկակի ստանդարտները հանվեն եւ բոլոր երիտասարդները ծառայեն բանակում»,- ասաց Բլեյանը:

Հունվարի 23-ին կառավարությունը հավանություն է տվել ԿԳՆ առաջարկած «Զինապարտության մասին» օրենքում փոփոխություն կատարելու մասին օրենքի նախագծին: Նախատեսվում է պետական պատվերով, միջպետական և միջգերատեսչական համաձայնագրերով օտարերկրյա պետությունների բարձրագույն ուսումնական հաստատությունների մագիստրատուրաներում կամ ասպիրանտուրաներում սովորողներին տարկետում տալ միայն հանձնաժողովի թույլտվությամբ և գրավի պայմանով: Գրավի չափը կազմում է 8.5 միլիոն դրամ: Ըստ ներկա գործող կարգի` բանակից տարկետում են ստանում բոլոր նրանք, ովքեր հաղթում են բուհերի ընդունելության մրցույթներում: