Սերժ Ավետիքյանի նոր կատակերգությունն Ադրբեջան մեկնող և հայկական գյուղում հայտնված ֆրանսիացու մասին է

Կաննի կինոփառատոնի դափնեկիր Սերժ Ավետիքյանի և ֆրանսիացի կատակերգու Ժան Ֆրանսուա Դերեքի համատեղ նկարահանվող կատակերգությունը, ստացել է աշխատանքային «Ինչպես մի ամերիկյան երգ» անվանումը: Ֆիլմի սցենարն արդեն թարգմանված է հայերեն և ներկայացված է տարբեր պրոդույսերների դատին: Փարիզից «Արմենպրես»-ի թղթակցի հետ զրույցում Ավետիքյանը պատմեց, որ մայիսին իրենք կկողմնորոշվեն, թե որ հայ պրոդյուսերի հետ կաշխատեն: «Մոսկվայից էլ կան հայ պրոդյուսերներ, ովքեր հետաքրքրված են այս աշխատանքով: Իմ կարծիքով` ֆիլմի դինամիկան հետաքրքիր ձևով է ընթանում: Այստեղ իսկապես առկա է համարտադրություն Հայաստանի հետ և դերասանները նույնպես մեծամասնությամբ Հայաստանից են լինելու: Իրենք առաջիկայում կընտրվեն քասթինգի միջոցով»,- նշեց կինոռեժիսորը:

Ադրբեջան մեկնող և հայկական գյուղում հայտնված ֆրանսիացու մասին ֆիլմին նման անվանում տալն իր պատճառներն ունի: «Ֆիլմում կա երկխոսություն, որը մարդկանց հարաբերությունների մասին է, ֆրանսիացի հերոսն ասում է. «Կարծես մի ամերկյան երգ լինի, երբ երգի բառերը չես հասկանում շատ լավ է, բայց երբ սկսում ես դրա բառերը հասկանալ, ինչ-որ տխմար մի բան է թվում»»,- պարզաբանեց ֆիլմի հեղինակը' ընդգծելով, որ «Ինչպես մի ամերիկյան երգ» ֆիլմն առաջին հերթին հաղորդակցության մասին է:

«Ֆրանսիացին ասում է մեզ մոտ ամեն ինչ հիմնված է հաղորդակցության վրա, կան հոգեբաններ, վերլուծություններ են կատարվում, սակայն իսկական հաղորդակցություն կարծես չկա, իսկ ես հայտնվել եմ մի վայրում որտեղ ոչ ոք իմ լեզուն չի հասկանում, ես էլ իրենց չեմ հասկանում, բայց իսկական հաղորդակցության մեջ եմ և կարծես ճիշտ ենք միմյանց հասկանում»,- ֆիլմի գաղափարը ներկայացնելով ասաց Ավետիքյանը' հավելելով, որ կատակերգության գաղափարը հետաքրքիր է, որովհետև այսօրվա մարդկային չափանիշների հետ է առնչվում:

Ֆիլմի նկահարահումների իրականացման համար նա նախանշում է 2014 թվականի աշունը կամ 2015-ի գարունը: Նոր կատակերգության նկարահանումների մեծ մասը կիրականացվի Վայոց ձորի մարզի Խաչիկ գյուղում: 2013 թ. հոկտեմբերին Ժան Ֆրանսուա Դերեքի հետ սցենարի հարստացման և նկարահանումների վերջնական վայրը որոշելու նպատակով այցելել էր Հայաստան, Խաչիկ գյուղ, որի արդյունքում սցենարային որոշակի փոփոխություններ են տեղի ունեցել:

«Ինչպես մի ամերիկյան երգը» կներկայացվի պատմություն, թե ինչպես է մի ֆրանսիացի արտիստ գնացել Ադրբեջան' համերգ տալու նպատակով և, պատահաբար անցնելով սահմանը, հայտնվել է հայկական գյուղում: Արդյունքում' գյուղում հայտնված հյուրի և գյուղացիների միջև հետաքրքիր փոխհարաբերություններ են ձևավորվում: Ավետիքյանի գնահատմամբ' ֆիլմում արծարծվում է այն գաղափարը, որ անգամ եթե լեզու էլ չգիտես և կարողանում ես մի կողմ դնել խնդիրները ու հասկանալ մյուսի աշխարհը, ապա մարդկային փոխհարաբերությունը շատ ավելի ջերմանում է. անհեթեթ իրավիճակի մեջ անգամ մարդկային շատ նուրբ կապեր կան: