Վրաստանը նշում է Ապրիլի 9-ի զոհերի հիշատակի օրը

Վրաստան 9 Ապրիլ, 2015 21:49

Ապրիլի 9-ին Վրաստանը նշում է Անկախության վերականգնման օրը և 1989 թվականին Թբիլիսիում ԽՍՀՄ պաշտպանության նախարարության զորքերի կողմից բազմահազարանոց հանրահավաքի ցրման զոհերի հիշատակի օրը, տեղեկացնում է «Արմենպրես»-ը՝ հղում անելով «Նովոստի Գրուզիա»-ին:

Ապրիլի 9-ը Վրաստանում հանգստյան օր է, ազգային միասնության, քաղաքացիական համաձայնության և հայրենիքի համար զոհվածների հիշատակի օր: Հաստատված ավանդույթի համաձայն՝ այդ օրը թբիլիսցիները, ի հիշատակ զոհվածների, կակաչներ են դնում նախկին խորհրդարանի շենք տանող աստիճաններին: Թբիլիսիի բնակիչները ողբերգության վայրում սկսում են հավաքվել գիշերվանից:

Հանրահավաքի ցրման հետևանքով զոհվել է 21 մարդ, որոնց մեծամասնությունը կանայք են: 1989 թվականի ապրիլի 9-ին Թբիլիսիում տեղի ունեցած իրադարձությունների հետաքննման համար ԽՍՀՄ ժողովրդական պատգամավորների համագումարի կողմից ստեղծվել էր հանձնաժողով՝ Անատոլի Սոբչակի գլխավորությամբ: Հանձնաժողովը եզրակացրել է, որ ցուցարարների դեմ անհամամասնական ռազմական ուժ է կիրառվել:

1989 թվականի ապրիլի 9-ի օրը, կամ, ինչպես այն հետո սկսեցին անվանել, «արյունոտ կիրակին», 25 տարի առաջ բեկումնային դարձավ Վրաստանի համար: Ուղիղ երկու տարի անց՝ 1991 թվականի ապրիլի 9-ին ազգային շարժման առաջնորդ Զվիադ Գամսախուրդիան՝ Վրաստանի ապագա նախագահը, հայտարարեց Վրաստանի անկախության վերականգնման մասին:

Վրաստանի նախագահ Գեորգի Մարգվալաշվիլին և առաջին տիկին Մակա Չիչուան այսօր ծաղիկներ են դրել Թբիլիսիի խորհրդարանի շենքի մոտ: «1989 թվականին այստեղ հեղված հայրենասերների անմեղ արյունը երկու տարի անց արտացոլվեց Վրաստանի անկախության ակտում: Բնականաբար, մենք ամեն տարի հարգելու են այն մարդկանց հիշատակը, ովքեր այստեղ պաշտպանում էին ապագա պետականությունը, և մենք շնորհակալություն ենք հայտնում նրանց այն ավանդի համար, որն անկախություն բերեց Վրաստանին»,-հայտարարել է Մարգվելաշվիլին: