Խակասիայում մոլեգնող հրդեհների հետևանքով զոհերի թիվը հասել է 15-ի

15 մարդ է զոհվել Խակասիայում մոլեգնող հրդեհների հետևանքով: Այդ մասին հայտնել են հանրապետության առողջապահության նախարարությունից, փոխանցում է ՏԱՍՍ-ը:

«Բուժօգնության է դիմել 613 մարդ, որոնցից 78-ը հոսպիտալացվել է: Տուժածներից ութը ծանր վիճակում են, 70-ի վիճակը գնահատվում է միջին ծանր: 533-ն արդեն ստացել են բուժօգնությունը և տուն ուղարկվել»,- ասել է նախարարի օգնական Միխաիլ Մալգինը:

Հրշեջներին հաջողվել է մարել հրդեհները Խակասիայի մի քանի տասնյակ բնակավայրերում: Ինչպես ապրիլի 13-ին հաղորդել է Ռուսաստանի արտակարգ իրավիճակների նախարարության (ԱԻՆ) հանրապետական վարչության կայքը, հանրապետությունում մնացել է սոսկ մեկ գործող հրդեհ` Ուստ Բյուր ավանում (Ուստ Աբականի շրջան): Մնացած բոլոր հրդեհները կա՛մ լիովին վերացվել են, կա՛մ էլ տեղափակվել են, և այնտեղ կատարվում է օջախների վերջնամարում»,- ճշտել են գերատեսչությունում:

Վերջին տվյալներով՝ կրակը վնասել է 1285 մասնավոր բնակելի տուն 38 բնակավայրերի տարածքում: Ժամանակավոր տեղավորման կետերում է գտնվում 560 մարդ, այդ թվում՝ 145 երեխա:

Ապրիլի 12-ին իշխանությունները հրդեհից վնասները գնահատել են՝ վիթխարի, բայց կոնկրետ թվեր չեն հայտնել: Հրդեհների պատճառների թվում սկզբնապես նշվել են գյուղատնտեսական նշանակության հողերում չոր խոտի անվերահսկելի հրկիզումները և անտառում կրակի հետ անզգույշ վարվելը»: Ավելի ուշ հավելվել է այն վարկածը, որ հրդեհավտանգ իրադրության սրումը տեղի է ունեցել փոթորկալից քամու և կտրուկ տաքանալու պատճառով: