ԱՄՆ-ում ինքնաթիռը հարկադիր վայրէջք է կատարել՝ բեռնատար մասում «մոռացված» բանվորի պատճառով

Alaska Airlines ավիաընկերությանը պատկանող ինքնաթիռը ստիպված է եղել վերադառնալ ԱՄՆ-ի Սիեթլ քաղաքի օդանավակայան, երբ թռիչքից հետո ինքնաթիռի բեռնատար հատվածից բղավոցներ ու հարվածի ձայներ են լսվել, հայտնում է interfax.ru-ն:

Ինքնաթիռը, որը Սիեթլից Լոս Անջելես էր ուղևորվում, վայրէջք է կատարել թռիչքից անմիջապես հետո:

Օդանավակայանի աշխատակիցների խոսքով՝ բեռնատար մասում գտնվել է բանվորը, որը չի կարողացել ժամանակին դուրս գալ ինքնաթիռից:

Նախնական տվյալներով՝ նա չի տուժել: «Ամեն դեպքում, երբ վարէջքից հետո բացվել է բեռնատար հատվածը, մարդն ինքնուրույն է դուրս եկել»,- ասել է օդանավակայանի ներկայացուցիչը:

Այժմ նա գտնվում է հիվանդանոցում՝ ստուգվելու համար: