Առաջին եռամսյակում տնտեսական աճ է գրանցվել. Թաթուլ Մանասերյան

Տնտեսագետ Թաթուլ Մանասերյանի համոզմամբ, այս տարվա առաջին եռամսյակում տնտեսական աճի զարմանալիորեն կայուն միտումներ են գրանցվել, որոնք նախորդ տարվա զարգացումների շարունակությունն են։

Ըստ նրա, դրական տեղաշարժեր են գրանցվել մի շարք ոլորտներում, մասնավորապես՝ արդյունաբերության ոլորտում՝ 16,4%։

«Այստեղ կարևոր ինդիկատոր է համարվում էներգետիկայի սպառումը, որը նշանակում է, որ ոչ միայն բնակչության կողմից, այլև տնտեսության այլ ճյուղերի՝ ձեռնարկությունների կողմից էլէկտրաեներգիայի սպառումը ավելացել է, ինչը նույնպես խոսում է որոշակի աշխուժացման մասին», – կարծիք հայտնեց տնտեսագետը։ 

Մանասերյանի տվյալներով, աճ է գրանցվել նաև ծառայությունների ոլորտում։

«Արտահանման ծավալներ են մեծացել, և նախորդ տարվա համեմատ, կարելի է ասել, որ նույնիսկ աննախադեպ աճ է գրանցվել՝ 32% արտահանման աճ», – նշեց նա։

Բացասական միտումներին անդրադառնալով՝ տնտեսագետը դրանց շարքում մատնանշեց շինարարության ոլորտում գրանցված անկումը, որը, նրա համոզմամբ սպասելի էր։

«Դա խոսում է այն մասին, որ տնտեսության աշխուժացումը դեռևս օրինաչափ միտման չի վերածվել, որովհետև շինարարությունը, ինչպես բոլորիս հայտնի է, շատ արագ արձագանքում է տնտեսական աշխուժացմանը», – լրագրողների հետ զրույցում նշեց նա։

Տնտեսագետը այդ ոլորտում գրանցված անկումը պայմանվորում է որոշակի միտումների առկայությամբ, որոնք զսպում են շինարարության աճը, այս դեպքում՝ անկումը։

«Օբյեկտիվ պատճառներ են այն իմաստով, որ վերջին տարիներին հագեցած և նույնիսկ գերհագեցած է անշարժ գույքի շուկան, բայց դա չի նշանակում, որ անշարժ գույքի շուկան կարող է դրանով սահմանափակվել։ Արտադրական տարածքների շինարարությւոնը կարող է աճել, և դրա հաշվին տնտեսական աճ կարող է գրանցվել», – համոզմունք հայտնեց Մանասերյանը՝ կոչ անելով միայն անշարժ գույքի շուկայով չպայամանավորել տնտեսկան ոլորտը։ 

Ասուլիսի ընթացքում բանախոսը անդրադարձավ նաև այն խնդիրներին, որոնք, ըստ նրա, կարևոր է իրատեսորեն գնահատել և դրանց լուծման ուղղությամբ աշխատել։

«Կուզեի նախ կարևորել արդյունաբերության ոլորտը, որտեղ մենք մեծ կշիռ ունենք տնտեսական աշխուժացման մեջ։ Այստեղ մենք հիմնականում գործ ունենք ոչ այնքան վերամշակող ճյուղի, որքան՝ հումք արդյունահանող», – նշեց նա՝ կարծիք հայտնելով, որ այստեղ լուրջ խնդիր կա զարկ տալու վերամշակող արդյունաբերությանը և ավելացնել արդյունահանվող ապրանքի արժեքը ։

Ըստ նրա, սա իր հերթին փոխշաղկապվում է նորամուծությունների և նորարարությունների ներքին ներդրումների խթանման հետ։ Այստեղ Մանասերյանը կարևորեց գիտության ոլորտը, որը ոչ այնքան ֆինանասական ներդրումների կարիք ունի, որքան կազմակերպական բնույթի «օգնության»։