Ֆրանսիայի Էքս Ան Պրովանս քաղաքում բացվել է Ցեղասպանության զոհերի հիշատակին նվիրված խաչքար

Ֆրանսիայի Էքս Ան Պրովանս քաղաքի կենտրոնական պուրակում փետրվարի 26-ին տեղի է ունեցել Հայոց ցեղասպանության զոհերի հիշատակը հավերժացնող խաչքարի բացումը, որին հաջորդել է օրհնության ու օծման կարգ՝ Հայ առաքելական և Ֆրանսիական կաթողիկե եկեղեցիների քահանաների ձեռամբ։ Ինչպես տեղեկացնում են ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությու նից, խաչքարի բացումը հնարավոր է դարձել Էքս Ան Պրովանսի քաղաքապետարանի, տեղական հայկական համայնքի, «Հայս կլուբ» կազմակերպության միասնական ջանքերի շնորհիվ' Ֆրասիայում ՀՀ դեսպանության և Մարսելում ՀՀ գլխավոր հյուպատոսության աջակցությամբ:

Միջոցառմանը ներկա են եղել Ֆրասիայում ՀՀ դեսպան Վիգեն Չիտեչյանը, Մարսելում ՀՀ հյուպատոս Սամվել Լալայանը, Բյուշ Դե Ռոն շրջանի փոխպրեֆեկտ Սերժ Գութեյրոնը, Էքս Ան Պրովանսի քաղաքապետ Մարիզ Ժուասան Մասինին, փոխքաղաքապետեր, տեղական ինքնակառավարման մարմինների ընտրյալներ, շրջանային, տարածքային և մունիցիպալ մարմինների ներկայացուցիչներ, ֆրանսիական և հայկական կազմակերպությունների նախագահներ, լրագրողներ:

Էքս Ան Պրովանսի քաղաքապետն իր խոսքում նշել է, որ խաչքարի կանգնեցման նպատակը Հայոց ցեղասպանության անմեղ զոհերի հիշատակը վառ պահելն ու գալիք սերունդներին 1915 թվականին հայերի հանդեպ իրականացված Ցեղասպանության մասին իրազեկելն է: «Հայս Կլուբ» կազմակերպության նախագահ Միշել Տեր-Գևորգյանն իր ելույթում շնորհակալություն է հայտնել քաղաքապետին խաչքարի տեղադրման առթիվ' նշելով վերջինիս հետևողական հայամետ գործունեությունը:

Դեսպան Վիգեն Չիտեչյանն իր ելույթում անդրադարձել է հայ-ֆրանսիական բարեկամական հարաբերություններին, հայ համայնքի և Էքս Ան Պրովանսի տեղական իշխանությունների արդյունավետ ու բազմածավալ աշխատանքներին, որի արդյունքներից է Հայոց ցեղասպանության զոհերի հիշատակին նվիրված խաչքարի բացումը՝ նշելով, որ ցանկացած խաչքարի, հուշարձանի և ընդհանրապես պատմության էջերը հիշատակող և լուսաբանող կառույցների առկայությունն ապագա սերունդներին դաստիարակելու և ոգեկոչելու ամենագլխավոր միջոցներից է:

Միջոցառման ավարտին «Մասիս» նվագախմբի կատարմամբ հնչել է ֆրանսիական և հայկական ազգային երաժշտություն: Միջոցառումը լայնորեն լուսաբանվել է տեղական լրատվամիջոցների կողմից։