ՌԴ-ն և ԱՄՆ-ը համաձայնեցրել են Սիրիայում հրադադարի խախտման տվյալների ստուգման գործընթացը. Քերի

Ռուսաստանը և ԱՄՆ-ը համաձայնեցրել են Սիրիայում հրադադարի ռեժիմի խախտման վերաբերյալ տեղեկությունների ստուգման գործընթացը: Այդ մասին, ինչպես տեղեկացնում է «Արմենպրես»-ը, հայտարարել է ԱՄՆ-ի պետքարտուղար Ջոն Քերին՝ փետրվարի 29-ին ելույթ ունենալով Գերմանիայի արտաքին գործերի նախարար Ֆրանկ Վալտեր Շտայնմայերի հետ համատեղ անցկացված մամուլի ասուլիսում, որն այցով գտնվում է Վաշինգտոնում:

Քերին հայտնել է, որ վերջին օրերին մի քանի հեռախոսազրույց է ունեցել Ռուսաստանի ԱԳ նախարար Սերգեյ Լավրովի հետ: «Եվ մենք համաձայնեցինք, որ, չնայած երկուստեք հրադադարի ռեժիմի մի շարք խախտումների վերաբերյալ հաղորդումներին, մենք չենք ցանկանում հրապարակավ՝ մամուլի միջոցով, վիճել դրա շուրջ, մենք ցանկանում ենք աշխատել, որպեսզի նման դեպքեր չլինեն: Եվ մենք համաձայնեցրել ենք այն գործընթացը, որի միջոցով լուծելու ենք այդ խնդիրը»,- հավելել է ԱՄՆ-ի արտաքին քաղաքական գերատեսչության ղեկավարը:

Նա հիշեցրել է, որ Ժնևում և Ամմանում աշխատում է Ռուսաստանի և ԱՄՆ-ի մասնագետների խումբը: «Նրանք կապ են պահպանում միմյանց և Սիրիայում գտնվող մարդկանց հետ: Եվ մենք արձանագրելու ենք Սիրիայում մարտական գործողությունների դադարեցման ռեժիմի յուրաքանչյուր ենթադրյալ խախտում»,- ասել է ամերիկյան դիվանագիտության ղեկավարը, հաղորդել է ՏԱՍՍ գործակալությունը: