Թուրքիան առանց խնդիրների կհաղթի Ռուսաստանին. ռազմական փորձագետ

Սիրիայում՝ Ռուսաստանի և Թուրքիայի միջև ուղղակի ռազմական առճակատման դեպքում, ապացույց չկա, որ ՌԴ-ն անմիջականորեն կաջակցի նախագահ Բաշար Ասադի բանակին: Այս մասին հայտարարել է Իսրայելի պաշտպանության բանակի նախկին սպա, ռազմական փորձագետ Իգալ Լևինը:

Նա ենթադրում է, որ ռուսական իշխանություններն այդ դեպքում, կարող են հայտարարել, որ իրենց հիմնական առաքելությունը տարածաշրջանում՝ ահաբեկչության դեմ պայքարն է, ԻԼԻՊ-ի դեմ պատերազմը, քանի որ հենց սույն պատրվակով Ռուսաստանը՝ Սիրիայում տեղակայեց իր սեփական ռազմատիեզերական ուժերը:

Ըստ նրա, «արդեն հիմա տեսնում ենք, որ Ասադի զորքերը լի են ռուսական ժամանակակից տեխնոլոգիաներով: Սական, այդ ամենը պաշտոնապես օգտագործվում է Ասադի բանակի կողմից: ՌԴ-ն պաշտոնապես միայն ռազմատիեզերական ուժերն ունի»:

«Խոշոր պատերազմի դեպքում՝ Ռուսաստանը կարող է պարզապես օդանավերի վրա ռուսական գծանշումները ներկել սիրիականներով: Սակայն, ռուս օդաչուները կմնան»,- նշել է իսրայելցի փորձագետը:

Միևնույն ժամանակ, նա գտնում է, որ այս փուլում Սիրիայում ՌԴ ռազմատիեզերական ուժերի խումբը բավարար չէ Թուրքիայի և Սաուդյան Արաբիայի ավիացիային հակազդելու համար, որը նույնպես տեղակայում է իր ինքնաթիռները Սիրիայում:

Մոսկվան բացահայտ պատերազմի մեջ կմտնի Թուրքիայի հետ միայն այն դեպքում, եթե Թուրքիան հարձակվի ՌԴ-ի օբյեկտների վրա, ինչպիսին, օրինակ, նավատորմն է, կարծում է Լևինը:

Մեծ հաշվով՝ այս պատերազմի ելքը կլուծվի հենց օդում: Նա նշել է, որ Թուրքիայի ռազմաօդային ուժերը ներառում են 270 F-16 ինքնաթիռներ:

«Սա շատ լավ ինքնաթիռ է, որն ունակ է հարվածներ հասցնել ցամաքին՝ օդային տարածքը նվաճելու հնարավորությամբ: Պատրաստությամբ՝ թուրքերը ՌԴ-ից առաջ կանցնեն: Դա վերաբերում է նաև մարտական փորձին, և մեկ տարվա ընթացքում օդաչուին վերագրվող թռիչքային ժամերին: Տարածաշրջանում դա առավել հզոր օդուժն է, և ՌԴ-ն ստիպված կլինի ամբողջ երկրի ավիացիան ներգրավել, որպեսզի կարողանա դիմակայել այդ ուժին», - ասել է փորձագետը, որի խոսքերը մեջբերում է «Rosbalt»-ը: