Լավրովը և Քերին կարևորել են ՌԴ-ի և ԱՄՆ-ի զինվորականների դերը Սիրիայի հրադադարի համար

Ռուսաստանի արտաքին գործերի նախարար Սերգեյ Լավրովը և ԱՄՆ-ի պետքարտուղար Ջոն Քերին հեռախոսազրույցի ընթացքում նշել են երկու երկրի զինվորականների միջև կոորդինացման վճռորոշ նշանակությունը Սիրիայի հրադադարի համար: Այդ մասին, ինչպես տեղեկացնում է «Արմենպրես»-ը, հայտնել են Ռուսաստանի դիվանագիտական գերատեսչությունում՝ ամփոփելով Քերիի նախաձեռնությամբ կայացած զրույցի արդյունքները:

«Ուշադրության կենտրոնում էր Սիրիայում մարտական գործողությունների դադարեցման ռուս-ամերիկյան նախաձեռնության և ՄԱԿ-ի Անվտանգության խորհրդի համապատասխան որոշումների իրականացումը,- նշել են ՌԴ ԱԳՆ-ում:- Արտաքին քաղաքական գերատեսչությունների ղեկավարները հավաստել են մեր երկրների միջև կոորդինացման, նախ և առաջ ռազմական գծով, վճռորոշ նշանակությունը հրադադարի ռեժիմի ամրապնդման համար, որը պետք է պահպանվի թե՛ կառավարական ուժերի, թե՛ ահաբեկիչների հետ չկապված զինված ընդդիմության խմբերի կողմից»:

Կողմերը «պաշտպանել են Ժնևում Սիրիայի կառավարության և հայրենասիրական ընդդիմության միջև բանակցությունների վերսկսմանն ուղղված ՄԱԿ-ի ջանքերը՝ ի շահ հակամարտության քաղաքական կարգավորման»:

Լավրովը և Քերին «հաստատել են աջակցությունը Սիրիայի շրջափակված շրջաններ միջազգային կազմակերպությունների հումանիտար մուտքի խնդիրների լուծումը դյուրացնելուն», հաղորդել է ՏԱՍՍ-ը: