Հայտնի են դարձել ԱՄՆ-ում «գերերեքշաբթիի» առաջին արդյունքները

Միլիարդատեր հանրապետական Դոնալդ Թրամփը և ԱՄՆ-ի նախկին պետքարտուղար Հիլարի Քլինթոնը, որոնք հավակնում են ԱՄՆ-ի նախագահի պաշտոնին, առաջատարն են Հանրապետական և Դեմոկրատական կուսակցությունների նախնական ընտրություններում, որոնք անցկացվել են «գերերեքշաբթի»՝ մարտի 1-ին: Այդ մասին, ինչպես տեղեկացնում է «Արմենպրես», վկայում են ընտրողների հարցումների տվյալները, որոնք անցկացվել են CNN հեռուստաալիքի կողմից:

Թրամփը, ըստ էկզիտ-պոլերի տվյալների՝ հաղթում է Ջորջիայի, Վերմոնտի, Ալաբամայի, Մասաչուսեթսի, Թենեսիի և Արկանզասի նահանգներում: Ոչ մեծ առավելությամբ նա սենատոր Մարկ Ռուբիոյից առաջ է անցել Վիրջինիայի փրայմերիզներում, որտեղ նրա օգտին տրվել է ձայների 34 տոկոսը, իսկ Ռուբիոյի օգտին՝ 31 տոկոսը: Թրամփի հիմնական մրցակիցը՝ սենատոր Թեդ Քրուզը, հաղթում է Օկլահոմայում և Տեխասում՝ կարևորագույն նահանգներից մեկում, որն ապահովում է 155 պատվիրակների ձայներ:

Հիլարի Քլինթոնը Դեմոկրատական կուսակցության փրայմերիզները շահում է Ջորջիայի, Վիրջինիայի, Ալաբամայի, Թենեսիի, Արկանզասի և Տեխասի նահանգներում, իսկ նրա հիմնական մրցակիցը՝ սենատոր Բեռնի Սանդերսը՝ իր հայրենի Վերմոնտի նահանգում և Օկլահոմայում: Մարտի 1-ին փրայմերիզներ են անցկացվել Ջորջիայում, Վերմոնտում, Ալաբամայում, Մասաչուսեթսում, Տեխասում, Վիրջինիայում, Օկլահոմայում, Արկանզասում և Թենեսիում: Ալյասկայի, Կոլորադոյի և Մինեսոտայի նահանգներում անցկացվել են կոկուսներ, դրանց նախնական արդյունքները դեռևս հայտնի չեն: