Իսպանիայում շոգը գերազանցել է 20-ամյա վաղեմության ռեկորդները

Անոմալ շոգ է հաստատվել մայրցամաքային Իսպանիայի մեծ մասում. արեւահարությունից մահացել է մեկ մարդ:

Անդալուզիայի առանձին շրջաններում արդեն գրանցվել է 45 աստիճան, որը պատմական ռեկորդ է սեպտեմբերի համար: Այս տարածաշրջանում 42 աստիճան առավելագույն շոգը երկրի հարավում գրանցվել է 1988 թվականին: Կանխատեսումների համաձայն՝ շոգը կպահպանվի առնվազն մինչեւ սեպտեմբերի 7-ը:

Սպասվում է, որ սեպտեմբերի 6-ին իսպանական 38 մարզերում ջերմաչափի սյունը կգերազանցի 40 աստիճանի նշագիծը: Պետական օդերեւութաբանական գործակալությունը (Aemet) 16 մարզերում վտանգի «նարնջագույն» (ամենաբարձր) մակարդակ է հայտարարել, եւս վեցում՝ «դեղին»: Սեւիլիայում ջերմաչափի սյունը կբարձրանա մինչեւ 44 աստիճան:

40 աստիճանի նշագիծը գերազանցված է Բադախոսում (Էստրեմադուրա), Կորդոբայում (Անդալուզիա), Խաենում (Անդալուզիա), Գրանադայում (Անդալուզիա), Օրենսում (Գալիսիա), Լուգոյում (Գալիսիա), Տոլեդոյում (Կաստիլիա Լա Մանչա), Սյուդադ Ռեալում (Կաստիլիա Լա Մանչա) եւ մի շարք այլ բնակավայրերում: Մադրիդում ջերմաստիճանը մոտենում է 40 աստիճանին, հաղորդել է ՌԻԱ Նովոստին: