ԿԺԴՀ-ի սադրիչ գործողությունները «լուրջ հետեւանքներ» կունենան. Օբամա

ԿԺԴՀ-ի սադրիչ գործողությունները «լուրջ հետեւանքներ» կունենան: Այդ մասին սեպտեմբերի 9-ին հայտարարել է ԱՄՆ-ի նախագահ Բարաք Օբաման՝ մեկնաբանելով այդ օրը Փենյանի կողմից իրականացված հերթական միջուկային փորձարկումը:

Ինչպես հայտնել է Սպիտակ տան մամուլի քարտուղար Ջոշ Էռնեստը, Օբաման այս հայտարարությունն արել է նախագահական ինքնաթիռում՝ Լաոսից ԱՄՆ վերադառնալու ճանապարհին, որտեղ նա մասնակցել էր Արեւելասիական 11-րդ գագաթնաժողովի աշխատանքին:

Էռնեստի խոսքով՝ Օբաման մեկ անգամ եւս հաստատել է «ԱՄՆ-ի անխախտ հանձնառությունը» Ասիաեյում եւ ամբողջ աշխարհում իր դաշնակիցների անվտանգությունն ապահովելու հարցում:

Ավելի վաղ ԿԺԴՀ-ն պաշտոնապես հայտարարել է հերթական միջուկային փորձարկման մասին: Համապատասխան հաղորդագրությունը տարածել է Հյուսիսային Կորեայի Կենտրոնական հեռագրական գործակալությունը: Հարավային Կորեայի պաշտպանության նախարարությունը հայտնել էր, որ Հյուսիսը փորձարկել է իր պատմության մեջ ամենահզոր ատոմային ռումբը: Գերատեսչությունը նշել է, որ պայթյունի հզորությունը գնահատվում է մոտավորապես 10 կիլոտոննա:

ԿԺԴՀ-ն մինչ օրս իրականացրել է չորս միջուկային թեստ. 2006, 2009, 2013 թվականներին եւ 2016 թվականի հունվարին:

Հարավային Կորեայի նախագահ Փաք Քըն Հեն հայտարարել է, որ ԿԺԴՀ-ի նոր միջուկային փորձարկումը կխորացնի Փենյանի մեկուսացումը: Ճապոնիան Պեկինում դիվանագիտական ուղիներով ԿԺԴՀ-ին վճռական բողոք է հայտնել նոր միջուկային փորձարկման կապակցությամբ, հաղորդել է ՏԱՍՍ-ը: