Բոնոբո կապիկի գենոմը հրապարակված է

Գիտնականներն ավարտել են բոնոբո Pan panicus կապիկի գենոմի ընթերցումը։ Այսպիսով, գաճաճ շիմպանզեն վերջինն է մարդնման կապիկների շարքում, որի ԴՆԹ-ի հաջորդականությունը պարզված է։ Աշխատանքը տպագրվել է Nature պարբերականում, որի համառոտ բովանդակությունը ներկայացնում է NatureNews-ը։

Գիտնականներն աշխատել են Ուլինդի անունով տասնութամյա էգ բոնոբոյի հետ։ Հետազոտողների հետաքրքրությունը հիմնականում սևեռված էր բոնոբոյի, շիմպանզեի և մարդու նուկլեինաթթուների տարբերվող հաջորդականություններին։ Դրանց մեծամասնությունը վերաբերել է գենոմի «անգործ»՝ չկոդավորող հատվածներին (միջգենային տիրույթներ)։ Կապիկի մոտ հայտնաբերվել է բացառիկ միկրո-ՌՆԹ, որը, հավանաբար, մասնակցում է առայժմ չճշտված գեների աշխատանքի կարգավորման գործին։

Գենոմում հայտնաբերվել են նաև տիրույթներ, որոնք շատ նման են առանձին վերցրած և՛ շիմպանզեների, և՛ մարդու համապատասխան տիրույթներին։ Դրանք ծավալը կազմում է կենդանու գենոմի մոտ 1.6 տոկոսը։

Արդի տվյալներով, մարդու, շիմպանզեի և բոնոբոյի ընդհանուր նախնին ապրել է մոտ 6 միլիոն տարի առաջ։ Բոնոբոները շիմպանզեներից անջատվել են մոտ 2 միլիոն տարի առաջ, երբ նման բնակության արեալները բաժանվել են կոնգո գետով։ Այս ժամանակներից ի վեր, կենսաբանների պնդմամբ, այս երկու տեսակների միջև գենետիկ խաչասերում տեղի չի ունեցել։

Բոնոբոները բնակվում էին Կոնգո գետի հարավակողմում և նրանք, ի տարբերություն շիմպանզեների, ստիպված չեն եղել մրցակցության մեջ մտնել գորիլաների հետ կերային բազային տիրելու համար։ Հնարավոր է, որ դա է եղել նրանց վարքի զգալի փոփոխության պատճառը։

Գաճաճ շիմպանզեները ոչ միայն ավելի փոքր են իրենց հյուսիսային հարևաններից, այլև ավելի խաղաղասեր են։ Նրանք շատ ավելի հազվադեպ են հրահրում կոնֆլիկտներ, որոնց առաջացման դեպքում էլ լուծում են ոչ թե ագրեսիայի կամ տիրապետման միջոցով, այլ հյուրասիրության և սեքսի։ Վերջինս բոնոբոների շրջանում ունի շատ կարևոր դեր խմբի անդամների հարաբերությունների կարգավորման գործում։