Տիտանի վրա հայտնաբերել են արևադարձային լիճ

Աստղագետները Սատուրն մոլորակի արբանյակ Տիտանի հասարակածային անապատային հատվածում հայտնաբերել են մեթանի լիճ, որի խորությունը գերազանցում է 1 մետրը։ Հաղորդագրությունը տպագրվել է Nature պարբերականում, որի համառոտ բովանդակությունը բերում է պարբերականի կայքը։

Հայտնագործությունն արվել է ինֆրակարմիր տիրույթում «Կասինի» տիեզերասարքի կողմից 2004-2008 թվականների ընթացքում իրականացված դիտումների հիման վրա։ Սատուրնի խոշորագույն արբանյակի խիտ մթնոլորտի միջով հնարավոր է եղել որոշակիորեն նկատել 60 կիլոմետր երկարությամբ և 40 կիլոմետր լայնությամբ օվալաձև լիճ, որի պատկերը ստացվել է ինֆրակարմիր ճառագայթման 7 տարբեր ալիքի երկարություններով նկարների համադրման արդյունքում։

Տիտանի արևադարձային գոտում վերոնշյալ լճից բացի հայտնաբերվել են նաև ավելի սաղր 4 այլ ջրային ավազան։ Գիտնականների փոխանցմամբ, իրենց խորությամբ դրանք հիշեցնում են երկրային ճահիճները։

Մինչ այժմ համարվում էր, որ Տիտանի հասարակածային գոտին իրենից ներկայացնում քարուտ անապատ, իսկ ածխաջրածիններ հեղուկ վիճակում կարող են գոյություն ունենալ միայն բևեռներում։

Տիտանը գիտնականների ուշադրությունը գրավում է առաջին հերթին նրանով, որ այն, Երկրագնդից բացի, Արեգակնային համակարգության միակ մարմինն է, որի մակերևույթին հայտնաբերվել է հեղուկ։Տիտանյան լճերը հիմնականում բաղկացած են ածխածնի և ջրածնի միացություններից՝ գերազանցապես մեթանից։ Տիտանի վրա հեղուկը գնտվում է մշտական շրջապտույթի մեջ՝ այն գոլորշիանում է և կոնդենսանում տեղումների ձևով, ինչպես ջուրը՝ Երկրի վրա։

Նման պայմաններում երկրային տիպի կյանքի գոյությունն անհնարին է, սակայն դա չի բացառում այլ քիմիական միացությունների հիմքով ինքնակազմակերպման հնարավորությունը։ Ավելին, Տիտանի ուսումնասիրությունը կարող է բացահայտել տիեզերական էքստրեմալ պայմաններում կյանքի առաջացմանը նախորդող քիմիական էվոլյուցիայի ուղիները մանրամասներ։