ՀՀԿ-ն պաշտպանվում է Միլսից. ճշմարտությունը ա՞չք է ծակում

Շաբաթվա սկզբին` ՀՀ-ում ԱՄՆ դեսպան Ռիչարդ Միլսը, խոսելով հայ-ամերիկյան հարաբերությունների մասին, հայտարարել էր բառացիորեն հետևյալը՝ «Կոռուպցիայի այն տեսակը, որն առավել մտահոգիչ է, և որը հետ է պահում ամերիկյան ներդրողներին, այն կոռուպցիան է, որի հետևանքով փակվում են շուկաները, ձևավորվում է անարդար մրցակցություն: Դա այն է, երբ տնտեսական, քաղաքական կապեր ունեցող ազդեցիկ մարդիկ ծառայեցնում են իրենց հնարավորություններն ու լծակները իրենց շահերին, և արդյունքում ստեղծվում է անարդար միջավայր, չեն հաստատվում խաղի հավասար պայմաններ»: ԱՄՆ դեսպանի գնահատականների տողատակում Սերժ Սարգսյանի խոշոր պատասխանատվության շեշտադրումն է:

Դնելով հավասար մրցակցության պայման, իրատեսական, պրակտիկ քաղաքականության տեսանկյունից՝ դեսպան Միլսը, անկասկած, նկատի ունի իշխող համակարգում մրցակցությունը, առավել եւս՝ այն նուրբ ասեղի ֆոնին, որ թելվում է Սերժ Սարգսյանի անփոխարինելիության կամ այլընտրանք չունենալու թելով: ՀՀԿ-ն դեսպան Միլսի այս ակնարկին, եթե չասենք բացահայտ մեղադրանքին պատասխանել է Վահրամ Բաղդասարյանի շուրթերով: Մասնավորապես, նա նշել է, թե յուրաքանչյուր երկրում նախ իրենց կոռուպցիան պետք է կրճատեն, հետո նոր գնահատական տան մեր երկրին: Ստացվում է՝ ԱՄՆ-ում կոռուպցիան վխտում է, իսկ Միլսը հանդգնում է մեզ խրատներ տալ:

Ինչ խոսք՝ նման արձագանքն առավել քան զավեշտալի է և ցույց է տալիս հայաստանյան էլիտայի քաղաքական կամքի իրական մակարդակը, երբ գնահատականին ականջալուր լինելու փոխարեն՝ մրցում են, թե ով ավելի հոխորտալից կպաշտպանի գործող ռեժիմի պատիվը: Բաղդասարյանի պատասխանն ավելի աղմկոտ է և սկանդալային, քան Դավիթ Հարությունյանի ռեպլիկը ԵՄ դեսպան Սվիտալսկուն, քանի որ իր մեջ պարունակում է նաև փոխադարձ մեղադրանք: Ինչ արձագանք կտա այս հայտարարությանը Միլսը՝ դժվար է ասել, բայց որ իշխանությունների այս վարքը ռացիոնալ չէ և չի բխում Հայաստանի կենսական շահերից՝ ակնհայտ է:

Ստելլա Խաչատրյան