«Եթե Փաշինյանի շարժումը ձախողվի անգամ և մարի, միևնույն է` նորագույն սերունդը հայտ է ներկայացնելու». Հայկ Մարտիրոսյան

Քաղաքագետ Հայկ Մարտիրոսյանն իր ֆեյսբուքյան էջում գրել է.

«Մեծացել է մի սերունդ, որ բոլորովին նոր աշխարհի է պատկանում: Առաջացել է լուրջ դիսոնանս այդ նոր աշխարհի նոր սերնդի և հին Հայաստանի հին վերնախավի միջև: Վերնախավն ամեն դեպքում չի կարող գոյատևել առանց իրեն սատարող նոր սերնդի: Այս նոր սերունդը անգամ երիտասարդներ պարունակող հին աշխարհի վերնախավին չի սատարելու: 

Սաուդյան Արաբիան` տարածաշրջանի ամենավտանգավոր և հզոր պետությունը կառավարում է նոր սերնդի թագաժառանգը, որ հասկանալով, որ իր տարիքն անգամ իրեն չի կարող փրկել ձևավորված նոր սերնդի դժգոհությունից` բացառապես այդ նոր սերնդին ուղղված փոփոխություններ է կատարում իր թագավորությունում: Կանանց` մեքենա վարելու իրավունք է շնորհում, թուլացնում «բարոյականության ոստիկանությանը», թույլատրում կինոթատրոններն ու համերգասրահները և այլն: Եվ դա սալաֆիզմի ու վահաբիզմի օրրանում, որտեղ հենց ինքը` կառավարող արքայազնը այդ նույն կրոնական գաղափարախոսության մոլի կրող է իրականում:

Հայաստանում քաղաքական վերնախավը դա չի հասկանում: Այստեղ ողջ ուշադրությունը կենտրոնացված է պալատական բարձրակարգ և անկրկնելի խաղերով շարունակականություն ապահովելու վրա: Եվ նորագույն սերունդը մեծապես անտեսված է մնում: Եթե Փաշինյանի շարժումը ձախողվի անգամ և մարի, միևնույն է` նորագույն սերունդը հայտ է ներկայացնելու: Կայծն արդեն նետված է և անտեսված ծխացող կրակն անգամ` մի օր անպայմանորեն մեծ հրդեհի է վերածվելու»: