Մի կապեք դա Նիկոլ Փաշինյանի շարժման հետ. Սոս Ջանիբեկյանը՝ անկանոն երթեւեկության մասին

Դերասան Սոս Ջանիբեկյանը կոչ է անում փողոցներում անկարգություններ անողներին չկապել #ԻմՔայլը շարժման հետ: Ավելի քան 10 օր է ԱԺ պատգամավոր Նիկոլ Փաշինյանի նախաձեռնության շրջանակներում Հանրապետությունում տեղի են ունենում բողոքի խաղաղ ակցիաներ: Այդ ընթացքում Երեւանում ոմանք, օգտվելով առիթից, մեքենաները վարել են անկանոն եւ առանց պետհամարանիշերի: Դերասանն ընդգծում է, որ նման մարդիկ շարժման հետ կապ չունեն:

«Ասեմ, բարձր երաժշտություն ու անկարգ քշել, այս ժողովրդի մեջ սերմանել է հենց ԱՅՆ, ինչի դեմ մենք պայքարում ենք։ Կարծեմ եսիմ ում ախպոր տղաներն էին, կամ եսիմ ում քրոջ տղաներն էին, կամ եսիմ որ պապայի լակոտներն էին գրեթե միշտ իրենց նման վարքով ու թանկանոց մեքենաներով ուտում բոլորիս կյանքը։ Դրա դեմ ենք մենք հիմա պայքարում, խլեշ անելու փոխարեն։

Ու հենց նույն մարդիկ էին արդեն 20 տարուց ավել սերմանել էս երկրի մեջ հենց այն, ինչի 3% արտացոլանքին ականատես եղանք երեկ։

Մենք հենց դրա դեմ ենք ուզում պայքարել, որ դա չշարունակվի, խնդրում եմ դա մի կապեք այն Nikol Pashinyan / Նիկոլ Փաշինյան -ի քաղաքակիրթ շարժման հետ, որը տեղի է ունենում արդեն օրեր շարունակ։

Անկարգ երթեւեկությունը արդի է մինչեւ հիմա, ոմանք նկարվում էին փողոցի կարգ ու կանոնը հետեւող տեսախցիկներով ու թալանվում երկրի «տերերի» կողմից, ոմանք նկարվում նկարները տալիս իրենց պապային որպես պարծանք։ Ու հենց դրա դեմ ենք մենք պայքարում։

Նա, ով հակառակ է քշում երթեւեկության կանոններին, նա այն տղան է, որի հերոսի պատկերացումը, հենց այդպիսին էին ստեղծել մեր երկրի «տերերը»։

Եվ հենց դրա դեմ ենք մենք պայքարում։

Այն, ինչի 3% արտացոլանքը մենք տեսանք երեկ, վառ ապացույցն էր այն գռփած փողերի, որոնք ուսման, դաստիարակչական, ճաշակի, հիգենայի, քաղաքակրթության, մշակույթի, զարգացման փոխարեն, մեծացրել են ինչ-որ մեկի դղյակներն ու նստատեղերը։

Այ հենց դրա համար է մեր պայքարը։

Այն, ինչ արտացոլվեց երեկ ճաշակային իմաստով, հենց մեր երկրի տերերի կերակրած ճաշակն էր ժողովրդին, ինչի դեմ մենք պայքարում ենք։

Այն, ինչը որպես զենք եք օգտագործում մեր դեմ հիմա, 20 տարուց ավելի Ձեր դաստիարակածն է։

Խնդրում եմ մի խառնեք բոլոր ալիքները»,- գրել է նա ֆեյսբուքի իր էջում: