Հուսով եմ, որ ժամանակ առ ժամանակ կունենամ հնարավորություն Ձեզ հետ շփվելու նաև երաժշտության միջոցով. վարչապետի աշխատակազմի ղեկավար

Թավշյա հեղափոխության հաղթանակից հետո վարչապետ ընտրված Նիկոլ Փաշինյանի առաջին որոշումը Էդուարդ Աղաջանյանի նշանակումն էր: Հիշեցնենք՝ վարչապետ Փաշինյանի հրամանով Էդուարդ Աղաջանյանը նշանակվեց ՀՀ վարչապետի աշխատակազմի ղեկավար: 

Էդուարդ Աղաջանյանը 30 տարեկան է, «Քաղաքացիական պայմանագիր» կուսակցության և Երևանի ավագանու «Ելք» խմբակցության անդամ է: Երևանի քաղաքապետարանի պաշտոնական կայքէջում հրապարակված կենսագրական տվյալների համաձայն, Մոնակոյի միջազգային համալսարանի բիզնես ադմինիստրացիայի ֆակուլտետի բակալավրի և ֆինանսական ակտիվների կառավարման ֆակուլտետի մագիստրոսի կոչումներ ունի: 2014 - 2017 թվականներին զբաղվել է անհատ ձեռնարկատիրությամբ՝ հանրային սննդի կազմակերպման ոլորտում։

Մամուլու բազմիցս գրվեց նաև նրա նախասիրություններից մեկի՝ այսպես կոչված, DJ-ինգի մասին: Այդ առնչությամբ 

Էդուարդ Աղաջանյանն իր ֆեյսբուքյան էջում գրել է.

«Վերջին օրերին շատ խոսվեց Ձեր խոնարհ ծառայի DJ-ինգով զբաղվելու մասին: Ուրախ եմ, որ արձագանքներն առավելապես դրական էին:

Բայց կարևոր եմ համարում նշել, որ դա ինձ համար մշտապես եղել է հոբբի և ոչ պրոֆեսիոնալ զբաղմունք, ինչպես կլիներ օրինակ կիթառ կամ դաշնամուր նվագելը: Ըստ այդմ, այն երբևէ չի հանդիսացել գումար վաստակելու միջոց:

Առաջնահերթությունները հստակ են:

Այնուամենայնիվ, հուսով եմ, որ ժամանակ առ ժամանակ կունենամ հնարավորություն Ձեզ հետ շփվելու նաև երաժշտության միջոցով:

ՀՀ Քաղաքացու խոնարհ ծառա»: