Նախարարները շտապում են միտինգային հռետորաբանությամբ

Այս կառավարությունը գործում է դեռ երկու շաբաթ, և ես հորդորում եմ շատ կտրուկ ակնկալիքներ չունենալ քաղաքական զարգացումներում փոփոխությունների առումով. կարծում եմ՝ նոր Կառավարությունը պետք է օգտագործի այն մեծ վստահության բազան, որ ունի՝ չկրկնելով նախորդ Կառավարությունների տիպիկ սխալները: Այս մասին այսօր լրագրողների հետ զրույցում ասաց «Ընդդեմ իրավական կամայականությունների» ՀԿ-ի գործադիր ղեկավար Լարիսա Ալավերդյանը:

Վերջինս նկատեց, որ Նիկոլ Փաշինյանն ու իր թիմը որքան արագ ձեռք են բերել վստահության շատ մեծ բազա, նույնքան արագ էլ դա կարող են կորցնել, եթե չհրաժարվեն որդեգրած շտապողականությունից:

ԼՈւՐԵՐ.com-ը Ալավերդյանից հետաքրքրվեց՝ ինչ շտապողականության մասին է խոսքը՝ խնդրելով դրանք մանրամասնել.

«Ես կարծում եմ, որ շտապողականություն դրսևորել է, օրինակ, Կրթության և գիտության նախարար Արայիկ Հարությունյանը, ում հռետորաբանությունը դեռևս միտինգային է, նա արդեն սկսել է պիտակավորումների լայն շղթա: Ինչ վերաբերում է Սփյուռքի նախարարին և նրա հասցեին հնչող քննադատություններին, ապա պետք է ասեմ, որ  երիտասարդությունը այն բանը չէ, ինչի համար պետք է քննադատվել, դա մեծերիս համար մարտահրավեր պետք է ընկալել: Բոլոր նախարարները պետք է ձգտեն ինստիտուցիոնալ կապ ստեղծեն հասարակության հետ՝ չշտապելով միևնույն ժամանակ ինչ- ինչ բաներ ի ցույց դնել թե՚ հեռացող իշխանություններին, թե՚ նույն հասարակությանը»-ասաց Ալավերդյանը՝ շտապողակնության դրսևորում համարելով նաև ԱԱԾ-ի բացահայտումն ու սկանդալային հայտարարությունը: 

Անդրադառնալով նոր Կառավարության որդեգրած քաղաքականությանը՝ Ալավերդյանը շեշտեց, որ նոր թիմը չպետք է խորշի լուրջ մասնագետներին այդ թիմ հրավիրելով՝ անկախ հանգամանքից՝ քաղաքական ինչ հայացքներ ունեն. «Մեր հասարակությունը հարուստ է մասնագետներով բոլոր ոլորտներում: Ես համարում եմ՝ և՚ Հրանտ  Բագրատյանը, և՚  Թաթուլ Մանասերյանը պետք է ներգրավվեն նոր թիմում, նրանց որպես մասնագետներ պետք է օգտագործել՝ ընդգրկելով փորձագիտական խմբերում և հասարակական խորհուրդներում.  դա հնարավորություն կտա օգտվել նրանց ներուժից և կիսել նաև պատասխանատվությունը»,-ասաց նա: 

Աղավնի Սուքիասյան