«Դոն Պիպոն» պետք է ցուցմունք տա

Իրավունք 28 Մայիս, 2018 15:58

Օրերս Հայաստան ժամանած քրեական հեղինակություն Արթուր Ասատյանը՝ «Դոն Պիպոն», լրատվամիջոցներից մեկի հետ զրույցում շնորհակալություն էր հայտնել իր խոսքով՝ «թազա» Կառավարությանը և Նիկոլ Փաշինյանին՝ թավշյա հեղափոխության հաղթանակի համար։

Ասատրյանն իր այս նախադասությունն արտահայտելուց առաջ հավանաբար չէր գիտակցել դրա խորքային բովանդակությունը, հատկապես այն, որ «թազա» Կառավարության գլխավոր նպատակն առանց կրիմինալի Հայաստանն է, իսկ ինքը ճիշտ հակառակի՝ կրիմինալի ցայտուն դրսևորում է՝ խրված քրեական գործերի մեջ, որոնցից վերջինն արձանագրվեց 2017 թվականին։

Իսկ 2017 թվականի մայիսի 24-ին մամուլը գրեց այն մասին, որ մահափորձ է ծրագրվել երկու քրեական հեղինակությունների՝ Արթուր Ասատրյանի՝ «Դոն Պիպո» և Արամ Վարդանյանի՝ «Վստրեչի Ապերի» նկատմամբ և գործով անցնում էին 4 անձինք՝ Վազգեն Ղազախեցյանը, Արտակ Այվազանը, Արկադի Քոչինյանը և Զոհրաբ Ղումաշյանը: Ըստ նրանցից մեկի ցուցմունքի՝ «Դոն Պիպոյի» «քիլլերները» 3 օր գերության մեջ են պահել, ծեծի ենթարկել այդ մարդկանց:

Թե ինչ փուլում է այս քրեական գործը, ԼՈւՐԵՐ․com-ի փորձեց ճշտել գործով անցնող Արկադի Քոչինյանի պաշտպան Արմինե Ֆանյանից։

Պաշտպանը նշեց, որ մեկ տարի անցել է, սակայն դեռ որոշված չէ, թե «Դոն Պիպոյի» դեմ ծրագրված մահափորձի գործը որ դատարանը պետք է քննի։

«Հաշվի առնելով, թե ովքեր են խառնված այս քրեական գործին` պարզ է դառնում, թե ինչու այսքան ամիս անց հստակ չէ, թե դատական գործը որ դատարանում է քննվելու՝ Արմավիրի մարզի՞, թե՞ Երևանի ընդհանուր իրավասության դատարանում»։

Հարցին՝ արդյոք 3 օր մարդկանց գերության մեջ պահելը չի կարող հիմք հանդիսանալ նոր քրեական գործի համար՝ Ֆանյանը նկատեց․ «Սպանության նախապատրաստման մասով գործն ուղարկվել է դատարան։ Իսկ երեք օր քաղաքացիներին անազատության մեջ պահելու մասով դեռ գործ հարուցված չէ»,-ասաց պաշտպանը՝ ընդգծելով, որ նման հնչեղ գործով որևէ դատարան չի ցանկանում ամբողջական քննություն տանել՝ հաշվի առնելով, գործով անցնող քրեական հեղինակությունների հանգամանքը։

«Սակայն այդ մարդիկ դատարան պետք է գան, ցուցմունք տալն իրենց համար պարտականություն է»,-վերջում հավելեց պաշտպանը՝ նկատի ունենալով «Դոն Պիպո»-ին և «Վստրեչի Ապերին»:

ԼՈւՐԵՐ.com-ը նաև տեղեկություն էր հրապարակել, որ այս գործով Սերժ Սարգսյանին անձամբ բարեխոսել է «Դոն Պիպոյի» խնամին՝ Ռուսաստանի ամենահարուստ հայերից մեկը՝ Կամո Ավագումյանը, ով հանրության մեջ առավել հայտնի է որպես «Ավիլոնի Կամո»:

Կան տեղեկություններ նաև, որ Հայաստանում իշխանափոխությունից հետո Ռուսաստանի եւ ռուսահայ օլիգարխիայի շահերի ներկայացման առաքելությունը «Տաշիր խմբի» սեփականատեր Սամվել Կարապետյանից փոխանցվել է «Ավիլոն» ընկերության սեփականատեր, Ռուսաստանում «Մերսեդես» մակնիշի ներկայացուցիչ Կամո Ավագումյանին:

Լուսանկարում փաստաբան Արմինե Ֆանյանն է: