Այլմոլորակայիններ ստեղծողը. հայուհին մասնակցում է միջազգային մրցույթի

ԼՈւՐԵՐ.com-ի զրուցակիցն է նկարչուհի Արաքս Սարգսյանը: Նա իր ձեռքի և մտքի աշխատանքը ներկայացրել է միջազգային մրցույթում, որտեղ հաղթելը  նրան հնարավորութուն կտա սովորել աշխարհի ամենահայտնի կինոգրիմի դպրոցներից մեկում:

25-ամյա աղջիկը կրթությունը սկսել է գեղագիտության ազգային կենտրոնից, որտեղ  նկարչություն է սովորել: Կրթությունն այնքան էլ ֆորմալ չի եղել և նրան միաժամանակ տրվել է հնարավորություն՝ տիրապետել հարակից այլ մասնագիտությունների՝  քանդակ, դիզայն, գրաֆիկա:

Ինչքան էլ տարօրինակ թվա՝ Արաքսը բազմաթիվ այլ կերպարաներին զուգահեռ՝ նաև այլմոլորակայինի կերպար է ստեղծել, այն ուղարկել միջազգային դպրոցի հայտարարած մրցույթին և մեծ հույս ունի քվեարկությունների արդյունքում հաղթել, ինչն էլ նրան հնարավորություն կտա սովորել իր մասնագիտության համար շատ կարևոր դպրոցում:

-Գրեթե միշտ փնտրտուքների մեջ եմ եղել, երբեմն մտածում էի խաղերի համար համակարգչային կերպարներ ստեղծել, բայց որոշ ժամանակ անց հասկացա, որ դա իմը չէ, իմ աշխատանքները պետք է իրական և շոշափելի լինեն: Եվ մի օր, լրիվ պատահաբար, գտա միջազգային Cinema make up school-ը: Եվ հասկացա, որ սա այն ճանապարհն է, որով պետք է գնամ: Ես պետք է սովորեմ այս դպրոցում: Սա այն էր, ինչ ինձ պետք էր. այստեղ ստեղծագործող մարդը կարող է իր նկարները բերել իրական կյանք, ուր նրանք կարող են շարժվել, ապրել, ոչ թե մնալ քանդակի ֆորմատի մեջ: 

Սակայն այս դպրոց ընդունվելն այդքան էլ հեշտ չէ. այստեղ ընդունելությունը մրցութային կարգով է, բայց ես կարևոր փուլն արդեն անցել եմ, ստեղծել եմ իրենից մեծ բարդություն ներկայացնող Գիգերի շատ հայտնի կերպարներից մեկը՝ Քսենոմորֆը, որն արդեն մրցույթային կարգով իր հետևում է թողել մի քանի հարյուր մասնակցի: Հիմա 4 այլ մասնակցի հետ հայտնվել եմ եզրափակչում, որը կավարտվի այս ուրբաթ:

-Արաքս, ինչո՞ւ հենց այլմոլորակայինի կերպար ընտրեցիք:

- Սա գիշատիչ այլմոլորակային է: 1979 թվականին հայտնվել է "Alien" ֆիլմում: Կերպարը միշտ է ինձ հետաքրքրել և հենց լսեցի մրցույթի մասին, միտքս անմիջապես կանգնեց այս կերպարի վրա: Կերպարը ստեղծելիս օգտագործել եմ հիմնականում դիմակայուն փրփուր, զանազան խողովակներ՝ գազի, ջրի, բժշկական կատետորներ և տարատեսակ այլ գործիքներ: 

-Ի՞նչ կտա այդ դպրոցում սովորելը:

-Ձեռք բերած գիտելիքներով պատրաստվում եմ վերադառնալ հայրենիք և այստեղ զարգացնել  արվեստի այս ճյուղը, որը չկա: Մինչդեռ ինձ համար արդեն պարզ է դարձել, որ շատերին է այն հետաքրքրում: Բացի այդ, փորձով ու գիտելիքներով պատրաստվում եմ կիսվել այս ոլորտով հետաքրքրվողների հետ:

Մեր հայրենակցուհուն օգնելու համար կարող եք անցնել հետևյալ հղումով և քվեարկել: Ֆեյսբուքյան յուրաքանչյուր էջից կարող եք 24 ժամը մեկ քվեարկել նրա օգտին: Հիշեցնենք, որ մրցույթն ավարտվում է այս ուրբաթ:

Լուսանկարները՝ Միքայել Պետրոսյանի: