Նախազգուշացում «առողջապահական օլիգարխիային». ո՞ւմ նկատի ուներ նախարարը

Վերլուծական 30 Մայիս, 2018 18:25

Հանրության շրջանում մեծ աղմուկ է բարձրացրել Առողջապահության նախարարի ֆեյսբուքյան վերջին գրառումը, որում վերջինս հայտնել է, թե առողջապահական օլիգարխիան որոշել է հակահարված տալ նոր իշխանությունների հակակոռուպցիոն քայլերին` ի դեմս պատվիրված հոդվածների և տարատեսակ ասեկոսեների, որոնք պետք է ներկաներից ազատվելու առիթ դառնան, որպեսզի նրանք շարունակեն «հանգիստ ապրել»: Նախարարը նաև ակնարկել է՝ եթե վերջիններս շարունակեն օգտվել նոր իշխանությունների կոլեգիալ համեստությունից, երևի թե ստիպված է լինելու հստակ անուններ հնչեցնել:

Իրականում նախարարը ստիպված է լինելու անուններ հնչեցնել, քանի որ համակարգի փոշիացման գործում եղել են ոչ թե անհատներ, այլ համակարգված և ախափան ցանց՝ սկսած ուղեգրման գործընթացից, մինչև պետական պատվերների գումարները «մեջ-մեջ» անելը: Եթե նախարարը տեղյակ է հանցանքների, «միլիոնների մսխման» փաստերի մասին, նա պետք է ոչ թե «երևի սկսի արդեն անուններ տալ», այլ անհապաղ իր մոտ եղած տեղեկատվությունը և փաստերը հանձնի համապատասխան իրավապահ մարմիններին: Հեղափոխականի համար հրամայական պետք է լինի օր առաջ բացահայտել և հանրության դատին ներկայացնել հանցագործներին: Եվ ի վերջո՝ դա, եթե հիշողությունը մեզ չի դավաճանում, քրեորեն հետապնդելի արարք է, հանցագործության մասին իմանալ և չհայտնելը: Ուշագրավ է նաև այն տերմինը, որը նախարարը կիրառում է՝ «առողջապահական օլիգարխիա»: Մնում է միայն ենթադրել, թե ովքեր են մտնում այս «կաստայի» մեջ: Սակայն գաղտնիք չէ, որ վերջին շրջանում հայաստանաբնակ օլիգարխների համար ԲԿ-ի բիզնեսը դարձել էր ամենաեկամտաբերներից մեկը: Չմոռանանք նաև, որ վերջին շրջանում նախարարը խոսել էր նաև պետական բյուջեից մի քանի առողջարանների ուռճացված ֆինանսավորման մասին: Դրանցից մեկը պատկանում է ԱԺ նախկին խոսնակ Գալուստ Սահակյանի եւ առողջապահության նախկին փոխնախարար Վահան Պողոսյանի կանանց:

Ստելլա Խաչատրյան