«Հրապարակ». ՀՀԿ-ի թեկնածուն՝ վերահսկողական ծառայության պետի տեղակալ

«Հրապարակ» օրաթերթը գրում է.

«Երեկ վարչապետի որոշմամբ պետական վերահսկողական ծառայության պետի տեղակալ է նշանակվել Ալբերտ Աբգարյանը, ով 2017 թ. ԱԺ ընտրություններում առաջադրվել է ՀՀԿ համամասնական ցուցակով` 58-րդն էր։ Աբգարյանը եղել է Սերժ Սարգսյանի նվիրյալներից, նրա համար 2013-ին նախընտրական երգ է գրել: Մասնագիտությամբ իրավաբան եւ կոմպոզիտոր Աբգարյանի եւ Սերժ Սարգսյանի մտերմությունն սկսվել է 2007-ի վերջերից։ Սերժ Սարգսյանը, որպես վարչապետ, հանդիպել է ՀԿ-ների ղեկավարների հետ, վաղ տարիքից տեսողությունից զրկված Աբգարյանը հանդիպման ընթացքում բարձրացրել է հաշմանդամների աշխատանքի խնդիրը եւ կոչ արել Սերժ Սարգսյանին օրինակ ծառայել գործատուների համար: 2 ամիս անց Ս․ Սարգսյանը, դառնալով նախագահ, չի մոռացել Ալբերտի խնդրանքը եւ նրան հրավիրել է նախագահական՝ աշխատանքի։ 2005-ից նա աշխատում է պետական համակարգում, զբաղեցրել է տարբեր պաշտոններ Ազգային ժողովում: Իսկ 2009-ից աշխատել է Սերժ Սարգսյանի աշխատակազմում:

Դավիթ Սանասարյանի մյուս տեղակալ է նշանակվել Հայկ Սարգսյանը՝ Փաշինյանի «թիկնապահը», Սոցիալական պետական հիմնադրամի նախկին ղեկավար Զարեհ Սարգսյանի որդին, ով քայլարշավի ողջ ընթացքում, ինչպեսեւ մինչեւ վերջերս ուղեկցում էր Փաշինյանին։ Նա 2017 թ․ մարտի 31-ի միջադեպի՝ Մանախի եւ «Ելք» դաշինքի կողմնակիցների միջեւ տեղի ունեցած ընդհարման մասնակիցներից է եւ պարբերաբար հրավիրվում է դատարան՝ որպես տուժող։

Ավել մանրամասն՝ թերթի այսօրվա համարում:

Նշենք, որ այս առիթով ֆեյսբուքյան իր էջում գրառում էր կատարել Պետական վերահսկողական ծառայության նորանշանակ ղեկավար Դավիթ Սանասարյանը.

Այսօր վարչապետի որոշմամբ պետական վերահսկողական ծառայության ղեկավարի տեղակալներ նշանակվեցին Ալբերտ Աբգարյանը, Հայկ Սարգսյանն ու Տիգրան Ուլիխանյանը(չշփոթել ԱԺ պատգամավոր Տիգրան Ուրիխանյանի հետ)։

Առաջինը շնորհավորում եմ տեղակալներիս ու մաղթում բարի ծառայություն։ Վստահ եմ, որ մեր աշխատանքի արդյունքում ունենալու ենք շատ արդյունավետ գործունեություն ու դրանից միայն պետությունն է օգտվելու։

Տեսա, որ ընկերներիցս մի քանիսը սրտնեղել էին, որ Albert Abgaryanը աշխատել է նախագահի վերահսկողությունում։

Հարգելիներս, Ալբերտը տաս տարուց ավել իմ ընկերն է, իրեն շատ լավ եմ ճանաչում, չեմ կիսել քաղաքական որոշ մոտեցումներ, բայց իմ կռիվը նաև նրա համար է եղել, որ բազմակարծություն ապահովվի։ Ալբերտը պրոֆեսիոնալ է. և՛ իրավաբան է, և՛ տաղանդավոր կոմպոզիտոր։ Աշխատել է դիմում բողոքների բաժնում ու քաղաքական պաշտոն չի զբաղեցրել։ Վստահ եմ, որ մեծ ներդրում է ունենալու պետաիրավական համակարգի առողջացման գործում։

Վարչապետին ես եմ ներկայացրել Ալբերտի թեկնածությունը, և վարչապետը վստահել է ինձ, մնացածն իմ պատասխանատվության դաշտում է։

Հ.Գ. ես երջանիկ կլինեի, որ ֆիզիկական դժվարություններ ունեցող անձանց շրջանում նման կրթություն, գիտելիքներ, մտավոր կարողություններ և աշխատանքային փորձ ունեցող շատ քաղաքացիներ զբաղեցնեին ամենատարբեր պաշտոններ։ 

Իմ այս քայլով օրինակ եմ ծառայում մյուսների համար, որ ոչ միայն խոսքերով, այլև գործով ապացուցեն, որ սա հավասար հնարավորությունների և հավասար իրավունքների երկիր է։

Սիրում եմ բոլորիդ