Ռեստորան՝ կանաչապատ տարածքի փոխարեն. ո՞վ է տվել թույլտվությունը (տեսանյութ)

Այսօր՝ հունիսի 1-ին, Արամի 64 շենքի բնակիչները դուրս էին եկել փողոց. նրանք պահանջում էին վերջ տալ հարակից տարածքում ընթացող սրճարանի շինարարական աշխատանքներին: Բան այն է, որ «Ֆիշ Քլաբ» ՍՊԸ-ն, որն արդեն շենքի առաջին հարկում ունի ռեստորանային տարածք, բիզնեսն ընդլայնելու նպատակով ռեստորանի դիմացի հատվածում պատրաստվում է կառուցել բացօթյա սրճարան:

ԼՈւՐԵՐ.com-ի թղթակցի հետ զրույցում բնակիչները վրդովված պնդում էին, որ ըստ օրենքի, տվյալ հողատարածքը հանդիսանում է շենքի բնակիչների համասեփականությունը: «Առանց բնակիչների թույլտվության՝ որևէ մարմին իրավունք չունի այս տարածքը որևէ մեկին տրամադրել՝ կառուցապատումներ իրականացնելու համար»,- նշեց բնակիչներից մեկը, ապա,  մատնացույց անելով շինարարական աշխատանքեր տարվող հատվածը, հավելեց. «Այստեղ եղել են շատ գեղեցիկ թփեր, գեղեցիկ կանաչ տարածություն է եղել, ինչը, ինչպես տեսնում եք, այժմ երկաթներով է պատված»:

Բնակիչները կարծում են, որ բացի թփերից, կառուցապատողներն արմատախիլ կանեն նաև տարածքում գտնվող ծառերը: Մինչդեռ մեր թղթակցի հետ զրույցում շինարարության պատասխանատուները, ովքեր ոչ մի կերպ չցանկացան ներկայանալ, այլ բան էին ասում. «Ծառերին ձեռք չենք տալու, հակառակը՝ պատրաստվում ենք հողատարածքն այլ ծաղիկներով համալարել, իսկ  սրճարանը սեզոնային բնույթի է լինելու. ձմռանը հավաքվելու է»: 

ԼՈւՐԵՐ.com-ի թղթակցին շինարարները ցույց տվեցին նաև քաղաքապետարանի հետ կնքված վարձակալության պայմանագիր, որում ասվում էր, որ Արամի 64 հասցեի հարակից 114.4քառ. մետր տարածքը վարձակալական հիմունքներով տրվում է «Ֆիշ Քլաբ» ՍՊԸ-ի ներկայացուցիչ Արամ Զատիկյանին:

Նրանք լուսանկարներով ցույց տվեցին նաև, թե ինչպիսին է լինելու սրճարանի վերջնական տեսքը. ծառերն, ըստ կառուցապատողի՝ ամբողջությամբ պահպանվելու են: