Մինչև վերջերս վստահ էի, որ կգտնեմ լուծում, բայց այժմ անհանգստանում եմ. Աննա Հակոբյան (տեսանյութ)

Այսօր վարչապետ Նիկոլ Փաշինյանի կինը՝ Աննա Հակոբյանը, ով նաև «Հայկական ժամանակ» թերթի խմբագիրն է, ԵՊՀ-ում հանդիպել է ժուռնալիստիկայի ֆակուլտետի ուսանողների հետ: Հանդիպումն ուղեկցվել է հարցուպատասխանով:

Ուսանողներից մեկի հարցին, թե արդյո՞ք նոր իրավիճակում «Հայկական ժամանակ» օրաթերթը շարունակում է իր որդեգրած ընդդիմադիր դիրքորոշումը և մատնացույց անո՞ւմ է նոր կառավարության թերի կողմերը,  Աննա Հակոբյանը պատասխանեց, որ օբյեկտիվ ծանրաբեռնվածության պատճառով դեռ չի եղել խմբագրությունում և նույնիսկ չի հասցնում ընթերցել, սակայն վաղը ժողով է հրավիրել և լրագրողներին կոչ է անելու ավելի ուշադիր լինել կառավարության աշխատանքի նկատմամբ:  Աննա Հակոբյանը նաև հավելեց, որ «Հայկական ժամանակ»-ը  մնալու է ամենաազատ ու անաչառ լրատվամիջոցը և լինելու է ընդդիմադիր:

Ուսանողներից մեկը հիշեց, որ երբ 2012-ին Նիկոլ Փաշինյանը ընտրվեց պատգամավոր՝ դադարեցրեց խմբագրի գործունեությունը: Ուսանողը հետաքրքրվում էր,  թե արդյո՞ք նոր իրավիճակում Աննա Հակոբյանը կհետևի ամուսնու քայլին:

«Ես կառչած եմ և շատ դժվար կբաժանվեմ «Հայկական ժամանակ»-ի գլխավոր խմբագրի՝ իմ պարտականություններից, բայց փաստն այն է, որ այս պահի դրությամբ, առնվազն երկու ամիս՝ ես չեմ կարողացել իմ աշխատանքային պարտականությունները կատարել: Ինձ նաև ընկերները, բարեկամները հուշում են, որ էթիկայի տեսնակյունից՝ ճիշտ չի լինի, որ նոր կարգավիճակի բերումով ես շարունակեմ մնալ: Մինչև վերջերս վստահ էի, որ կգտնեմ լուծում, բայց այժմ անհանգստանում եմ: Այս պահին պատրաստ չեմ ասել, որ կանեմ դա, բայց, երևի իրավիճակը կհանգեցնի դրան»,-ուսանողի հարցին պատասխանեց Աննա Հակոբյանը:

Տեսանյութը՝ factor.am-ի: