«Վախեցած» Ցոլակյանը

Ազգային ժողովի Հանրապետական խմբակցության պատգամավոր Ֆելիքս Ցոլակյանը լրագրողների հարցին ի պատասխան ասել է, որ չի բացառում իր դուրս գալը Հանրապետական խմբակցությունից ավելի շուտ, քան կհասցնեն հեռացնել իրեն: 

Հիշեցնենք՝ լրատվամիջոցներից մեկի հետ զրույցում ՀՀԿ խմբակցության ղեկավար Վահրամ Բաղդասարյանը նշել էր, որ  կանոնակարգի համաձայն, եթե պատգամավորը երեք անգամից ավելի հակառակ է քվեարկում խմբակցության կարծիքին, նրա հարցը դրվում է հեռացման՝ ընդգծելով, որ Ցոլակյանը երկու անգամ է դեմ քվեարկել ՀՀԿ քաղաքական որոշումներին, որի համար նրան նկատողություն է հայտարարվել։

Հարցին՝ արդյոք մտահոգված չէ՞, որ իրեն նկատողություն են անում, Ֆելիքս Ցոլակյանն արձագանքել է. «Հա՛, շատ ծանր, հա՛»:

Դիտարկմանը՝ գուցե Ձեզ համար զգուշացո՞ւմ էր, որպեսզի հաջորդ անգամ ենթարկվեք խմբակցության որոշումներին, և չե՞ք վախենում, որ կհեռացնեն խմբակցությունից, Ցոլակյանն ասաց. «Հա՛, ահավոր վախեցած եմ: Ոչինչ, կարող է ես դուրս գամ ավելի շուտ, քան թե իրենք կհասցնեն հեռացնել»:

Նկատենք նաև, որ Ֆելիքս Ցոլակյանը թեպետ ՀՀԿ խմբակցությունից է, բայց նա այդ կուսակցության անդամ չէ:

Հիշեցնենք՝ Ֆելիքս Ցոլակյանը Հանրապետական միակ պատգամավորն էր, ով մայիսի 1-ին Վարչապետի ընտրության ժամանակ առանց ՀՀԿ-ի հետ համաձայնեցնելու Փաշինյանին կողմ էր քվեարկել: Նա հայտարարել էր. «Ես քվեարկել եմ ժողովրդի թեկնածուի օգտին՝ իմ խղճի թելադրանքով»:

Հանրապետական խմբակցության ղեկավար Վահրամ Բաղդասարյանն էլ ասել էր, որ Շիրակ Թորոսյանին հեռացրել են՝ խմբակցության որոշմանը դեմ գնալով Փաշինյանի օգտին քվեարկելու համար, իսկ Ֆելիքս Ցոլակյանի դեպքում բավարարվել են նկատողությամբ:

Արձանագրենք, որ խորհրդարանում մեծամասնություն կազմող Հանրապետական խմբակցության շարքերը գնալով նոսրանում են և սա նշանակում է, որ քսան տարի իշխանության ղեկին եղած և նախագծեր ընդունող ՀՀԿ-ն կզրկվի նաև խորհրդարանում մեծամասնություն լինելուց և մտավախությունը, թե կարող է նորընտիր իշխանության  ծրագրերը տապալել՝ կվերանա: 

Ի դեպ, այս օրերին ՀՀԿ-ում շատերն են ուղիներ փնտրում՝ «Ծառուկյան» դաշինքին և «Ելք»-ին միանալու համար: 

Սոնա Հարությունյան